Издадени налози за апсење на 62 лица одговорни за изградба на зградите кои се урнаа во земјотресот
Властите во Турција издадоа налози за апсење на неколку лица одговорни за изградбата на зградите кои се урнаа во катастрофалниот земјотрес во понеделникот, јавува Си-Ен-Ен повикувајќи се на турски медиуми.
Сопственикот на компанијата што ги изгради уништените згради во градот Адани, Хасан Алпаргун, е приведен во саботата во Никозија, Кипар, објави турската државна новинска агенција Анадолу.
Обвинителите во градот Адана издадоа налози за апсење на 62 лица во врска со истрагата за зградите уништени од земјотресот со јачина од 7,8 степени.
Мехмет Јашар Јошкун, за кој Анадолија вели дека е изведувач на блокот луксузни висококатници што се урна во провинцијата Хатај, исто така беше уапсен во саботата.
Јоскун во петокот бил уапсен од полицијата на аеродромот во Истанбул додека се обидувал да побегне во Црна Гора, наведува турската агенција.
Според извештајот, изведувачот Ибрахим Мустафа Унџуоглу бил приведен во саботата во Истанбул, поради наводни неуспешни инспекции во врска со становите во Бахар, кои се урнале во епицентарот на земјотресот во Газиантеп, јавува Си-Ен-Ен.
Бројот на загинати во земјотресите што во понеделникот ги погодија Турција и Сирија се искачи на 28.192 лица, соопштено е синоќа. Турскиот потпретседател Фуат Октај на прес-конференција изјави дека во таа земја загинале 24.617 лица.
