Севернокорејскиот лидер Ким Џонг-ун замина од Пјонгјанг за Русија со приватен воз, објавија денеска државните медиуми и објавија фотографии на кои се гледа дека најверојатно патувал придружуван од највисоките претставници на воената индустрија, дипломати и воени команданти.
Ким го започна своето патување во неделата за да се сретне со претседателот Владимир Путин, објави државната новинска агенција КЦНА. Американските власти, кои први зборуваа за можноста за ваква посета, тврдат дека една од темите на разговорот најверојатно ќе биде договор според кој Северна Кореја ќе и испорачува на Русија оружје за војната во Украина.
Како што објави КЦНА, Ким бил придружуван од највисоки владини претставници, вклучително и воен персонал. Во делегацијата има истакнати воени членови на владејачката партија, меѓу кои и директорот на секторот за индустрија за воена опрема Џо Чун Рионг, а според аналитичарите, составот на делегацијата укажува дека посетата главно ќе се фокусира на соработката во воената индустрија и безбедносните прашања.
„Присуството на Џо Чун Рионг укажува дека Северна Кореја и Русија ќе склучат некаков договор за купување на воена опрема“, изјави Мајкл Маден, експерт за Северна Кореја во центарот Стимсон во Вашингтон.
Фотографиите објавени од државните медиуми покажуваат воена почесна гарда и толпи кои веат цвеќиња и знамиња додека Ким се качува во темнозелениот воз, за кој се верува дека е оклопен и има друга специјализирана опрема.
Според видео изјавата објавена од портпаролот на Кремљ, Дмитриј Песков, главна тема на средбата меѓу Ким и Путин ќе бидат односите меѓу соседните земји.
„Ќе продолжиме да го зајакнуваме нашето пријателство“, рече тој. И Москва и Пјонгјанг ги негираа претходните обвинувања на САД дека склучиле договори за оружје, но и двете земји рекоа дека ќе ги зајакнат одбранбените врски.
makfax.com.mk
