Спротивно на апелите на граѓаните, шверцерски, во екот на ноќта, во текот на вчерашниот ден, со одобрение издадено од Марин, багери и тешка механизација пристигнаа на локацијата кај „Мајчин дом“ и почнаа со градежни активности, рече во денешната изјава за медиуми, Дејан Митевски, претседател на Општинскиот комитет на ВМРО-ДПМНЕ во Аеродром.
При обраќањето Митевски потсети дека Марин пред изборите ветувал повлекување на детаљниот урбанистички план и повеќе зелени површини за Аеродром.
„Состојбата сега е сосема спротивна. Наместо повлекување на ДУП-от, Марин издал и одобрение за градба, со што ставил потпис, како што велеше пред изборите, на еколошката катастрофа за Аеродром и запирањето на струењето на воздухот во општината“, обвини Митевски и додаде дека работењето на локалната самоуправа спротивно на интересите на граѓаните е недозволиво.
Притоа, во име на советничката група на ВМРО-ДПМНЕ и коалицијата, тој поденесе барање за свикување седница на Советот на Општина Аеродром со две точки на дневен ред.
Ќе бараме донесување предлог-одлука за запирање на спроведувањето на детаљните урбанистички планови, и тоа – ДУП за градска четврт И10, кај „Мајчин дом“, и ДУП за локалитетот Црква – УЕ Б „Тобако“, како и донесување предлог-одлука за задолжување на Одделението за урбанизам да изврши ревизија на двата горенаведени урбанистички плана и да го информира Советот на Општина Аеродром“, рече Митевски и повика седницата на Советот да биде закажана набргу што може.
![](https://skopje1.mk/wp-content/uploads/2022/01/2222.png)