Холандската влада избегна распад поради обвинувањата за антисемитизам и немирите во Амстердам
Коалиционите партии на холандската влада избегнаа раскол и ги решија несогласувањата околу наводните расистички изјави на владините министри. По неколкучасовни разговори во Хаг, премиерот Дик Шуф доцна синоќа изјави дека коалицијата има намера да продолжи да владее заедно. „Немаше и нема расизам во владата“, рече Шуф.
Политичката неизвесност беше поттикната од оставката на државната секретарка Нора Ахахбар претходно во петокот.
Таа поднесе оставка по извештаите дека владините министри ги обвиниле муслиманските мигранти за антисемитизам и ги сметаа за одговорни за нападите врз израелските фудбалски навивачи во Амстердам минатата недела, објавија холандските медиуми.
Ахахбар, родена во Мароко, е член на центристичката партија Нов социјален договор и служеше како државен секретар во Министерството за финансии. Останатите министри од таа партија решија да останат во владата.
Доколку партијата Нов социјален договор излезе од коалицијата, владата ќе го загуби мнозинството во парламентот. Во коалицијата е и екстремно десничарската Партија на слободата на Герт Вилдерс.
Десничарската влада најави сузбивање на антисемитизмот по целните напади врз израелските навивачи минатата недела во Амстердам на натпреварот меѓу Ајакс и Макаби Тел Авив, а Вилдерс повика да бидат протерани од земјата инволвираните во нападите и немирите.
Шуф рече дека интеграцијата на холандските Мароканци се покажала неуспешна. Истрагата на јавното обвинителство за насилството се уште е во тек и се уште не е јасно кој е одговорен за нападите. Според холандската полиција, и израелските навивачи извршиле насилни дејствија и ги навредувале Палестинците со расистички скандирања.
