Претседателот на Република Северна Македонија, Стево Пендаровски, денеска во Палата Србија во Белград, беше примен со највисоки државни и воени почести од претседателот на Република Србија, Александар Вучиќ, со што ја започна официјалната посета на Република Србија.
Двајцата претседатели остварија тет-а-тет средба, на која ги потврдија пријателските односи и меѓусебно разбирање меѓу Република Северна Македонија и Република Србија и ја потенцираа важноста и посветеноста на градењето, одржувањето и унапредување на меѓусебниот дијалог.
По средбата на двајцата претседатели, ќе се одржи и пленарен состанок меѓу делегациите на Република Северна Македонија и на Република Србија, по што ќе следува и заедничка прес конференција на претседателите. Прес конференцијата со почеток во 12:00 часот, ќе може да се проследи во живо на официјалната FB страница и на YouTube каналот на Претседателот на Република Северна Македонија.
Во рамки на официјалната посета, претседателот Пендаровски ќе оствари средби и со претседателката на Владата на Република Србија, Ана Брнабиќ, со претседателката на Народното собрание на Република Србија, Маја Гојковиќ, како и со претседателот на Стопанската комора на Република Србија, Марко Чадеж и стопанственици од Република Србија.
Во сабота, 23 ноември 2019 година, претседателот Пендаровски во Нови Сад ќе учествува на 4. Регионален младински форум и ќе се обрати на претседателскиот панел „Обраќање на младите пред претставниците на влаcта: презентирање на политичкиот дијалог пред милениумците“.
