Анонимните хакери од земјава најавија преку „Твитер“ дека следна цел им се извршителите.
„Извршители – убијци – вие сте на ред, спремете се“, се наведува на профилот на анонимната хакерска група.
Откако утрово беше хакирана веб-страницата на Министерството за здравство, хакерите на „Твитер“ пишуваат дека тие во ниту еден момент не го загрозиле серверот за е-пошта на здравство, туку направиле екстракт на е-поштата.
„Сајтовите и серверот за е-пошта се изгасени од страна на шалабајзерите кои се систем-админи во тие министерства“, се наведува на профилот „AnonOpsMKD“.
Здраво на сите, едно мало известување за вчерашниот напад.
МкдОпс ВО НИТУЕДЕН МОМЕНТ не го загрози маил серверот на здравство, само направивме екстракт на мејловите.
Сајтовите, и маил серверот СЕ ИЗГАСЕНИ од страна на шалабајзерите што се систем админи во тие министерства.— AnonOpsMKD (@MkdOps) July 24, 2020
Претходно од Министерството за здравство објавија дека нивната официјалната веб-страница не функционира, а не функционираат ниту службените е-адреси на вработените во институцијата.
Одговорноста за хакерскиот напад ја презеде групата што стои зад профилот „AnonOpsMKD“, а која претходно призна дека е одговорна и за паѓањето на македонскиот агрегат за вести Тајм.мк.