Вашингтон разгледува механизам според кој Москва би ослободила политички затвореници во замена за ублажување на американските санкции кон Русија, објави магазинот „Атлантик“.
Иницијативата, според магазинот, му ја предложил на американскиот претседател Доналд Трамп неговиот пратеник Џон Кол, кој претходно преговарал со Белорусија за ослободување на стотици притвореници во замена за олеснување на санкциите.
Трамп наводно се согласил да се разгледа сличен пристап и во односите со рускиот претседател Владимир Путин. Проектот сè уште е во рана фаза, а евентуалното ублажување на санкциите би можело да овозможи одредени трансакции поврзани со руска нафта, дизел и ретки минерали.
Според „Атлантик“, целта е да се воспостават одредени економски врски со Москва без да се чека завршувањето на војната во Украина. Кол смета дека проширувањето на економската соработка би можело да придонесе за намалување на тензиите и за поттикнување прекин на огнот.
Киев се противи на ублажување на санкциите пред завршувањето на војната. Украинскиот претседател Володимир Зеленски за „Атлантик“ изјавил дека ќе се обиде да го „блокира“ ваквиот развој, оценувајќи дека за Украина би било тешко да се справи со економската моќ на Русија.
Во меѓувреме, американските преговарачи разгледуваат можност за нова средба со руски и украински претставници во октомври, веројатно во Абу Даби. Разговорите би биле насочени кон ограничен прекин на огнот, вклучително и забрана за напади врз енергетската инфраструктура.
Според двајца украински преговарачи цитирани од американскиот магазин, се разгледува и посебен договор, со посредство на Египет, за прекин на нападите врз трговските бродови во Црното Море, особено оние што превезуваат пченица.
„Атлантик“ наведува дека оваа стратегија досега не била јавно објавена и дека значителен дел од извештајот се заснова на разговори со Кол, американски официјални лица и украински преговарачи, пренесе „Бета“.
