Авион на авиокомпанијата „EasyJet“ кој летал од Хургада во Египет кон Лондон, бил принудно пренасочен и итно слетал во Рим, откако било откриено дека патник има преносен полнач – power bank – во чекираниот багаж.
Летот EZY2618 за лондонскиот аеродром Лутон безбедно слетал на аеродромот „Фјумичино“ во Рим, откако капетанот донел одлука за пренасочување согласно безбедносните протоколи.
Според компанијата, патникот за време на летот ја известил кабинската екипа дека неговиот power bank се наоѓа во багажниот простор на авионот.
Иако немало никаков дефект или пожар, правилата строго забрануваат вакви уреди да се превезуваат во чекиран багаж поради ризик од запалување на литиум-јонските батерии.
Податоците од „FlightRadar24“ покажуваат дека авионот летал на височина од околу 11.000 метри кога, по речиси три часа лет над Јадранското Море, нагло го сменил правецот и слетал во Рим околу 20 минути подоцна.
По слетувањето, патниците морале да преноќат во Италија, а патувањето продолжило следниот ден.
Од „EasyJet“ соопштија дека безбедноста на патниците и екипажот е нивен главен приоритет и им се извинија на патниците за непријатностите.
Во последните години многу авиокомпании воведоа построги правила за power bank уредите, бидејќи евентуален пожар многу полесно се контролира во кабината отколку во багажниот простор.
„EasyJet“ дозволува вакви уреди само во рачен багаж, а секој патник смее да носи најмногу два. Слични правила имаат и „Ryanair“ и „British Airways“.
Стравувањата не се без основа. Во Австралија минатата година патник добил изгореници откако му се запалил power bank во џеб, а во Јужна Кореја ваков уред се смета за можна причина за пожар кој уништил патнички авион.
