Австралискиот премиер Ентони Албанез изјави денес дека не ја зема својата безбедност „здраво за готово“, откако во вторник беше евакуиран од својата резиденција на неколку часа поради наводна закана со бомба.
Албанез беше евакуиран од својата резиденција во Канбера во вторник доцна навечер по локално време поради безбедносна закана, а се врати неколку часа подоцна откако не беше пронајдено ништо сомнително, пренесува Ројтерс и наведува дека полицијата соопшти дека нема постојана закана.
„Мислам дека ова е само потсетник, искористете ја секоја прилика да ги предупредите луѓето и да ја намалите напнатоста. Не можеме овие работи да ги земаме здраво за готово“, рече денес Албанез на настан во Мелбурн.
Заканата со бомба била испратена до претставникот на Шен Јун, класична кинеска танцова трупа забранета во Кина, која требало да настапи во Австралија овој месец.
Во е-пошта напишана на кинески јазик и испратена до локалните организатори на групата, било наведено дека експлозив бил поставен околу резиденцијата на Албанез и дека ќе биде активиран ако таа танцова група настапи во земјата.
„Сите закани се пријавени кај австралиските безбедносни служби и органи за спроведување на законот. Го цениме преземеното за обезбедување на јавната безбедност и заштита на избраните функционери, вклучително и на премиерот“, соопшти кинеската танцова група.
