Возачите кои ќе сообраќаат низ Австрија од 1 јануари 2027 година ќе се соочат со значително повисоки казни за сообраќајни прекршоци, откако австриското Министерство за сообраќај објави нов каталог на казни.
Според новите правила, казните во просек ќе бидат повисоки за околу 50 проценти, а целта е да се подобри безбедноста во сообраќајот и да се усогласат санкциите во сите сојузни покраини.
Една од највисоките казни е предвидена за возење по лентата за запирање на автопат, за што прекршителите ќе плаќаат 200 евра.
Возење во левата сообраќајна лента без потреба, односно непочитување на правилото да се користи десната лента, ќе се казнува со 100 евра, додека претекнување од десната страна ќе чини 115 евра.
Повисоки казни се предвидени и за други прекршоци. Паркирање на места каде што е забрането запирање или паркирање, како и непоставување паркинг-диск во зоните каде што е задолжителен, ќе се казнуваат со по 60 евра. Влегување во раскрсница на жолто светло и непочитување на знакот „Стоп“ ќе чинат по 70 евра.
За пречекорување на дозволената брзина во населено место до 30 километри на час се предвидени казни од 50 до 120 евра, додека опасно претекнување, на пример пред пешачки премин, ќе се казнува со 140 евра.
Австриските власти посочуваат дека измените не се воведуваат за зголемување на приходите, туку за подобрување на безбедноста во сообраќајот и воспоставување единствени стандарди во целата земја.
Со оглед на тоа што Австрија е една од најчестите транзитни и туристички дестинации за граѓаните од Македонија, особено во периодот на зимските одмори, возачите кои патуваат низ земјата треба навреме да се информираат за новите правила и висината на казните.
