Неколку земји членки на Европската Унија, предводени од Австрија и Грција, го забавуваат процесот на пристапување на Украина во Унијата, инсистирајќи дека земјите од Западен Балкан не смеат да бидат запоставени.
Австриската министерка за Европа, Клаудија Бауер, изјави дека правилата и условите мора да важат еднакво за сите кандидати за членство.
„Не може за некои да постои брза лента, па практично веќе да се со една нога во Европската Унија, додека други чекаат со децении“, изјави Бауер во Брисел.
Сличен став има и Грција, која, според дипломатски извори од ЕУ, смета дека напредокот на Украина и Молдавија не смее да оди на штета на Западен Балкан, чија европска перспектива беше потврдена уште со Солунската агенда од 2003 година.
Од земјите во регионот, Црна Гора и Албанија моментално се најблиску до членство, додека Македонија, иако кандидат уште од 2005 година, со години е блокирана прво од Грција, а сега и поради спорот со Бугарија.
Србија, исто така кандидат од 2005 година, бележи застој поради демократско назадување, додека Босна и Херцеговина и Косово сè уште немаат значителен напредок.
Украина доби кандидатски статус во 2022 година и веќе ги престигна БиХ и Косово, а доколку во јуни започне отворањето на преговарачките кластери, ќе ја прескокне и Македонија.
Во меѓувреме, германскиот канцелар Фридрих Мерц предложи воведување „придружено членство“ за Украина, што би ѝ овозможило делумни права пред полноправно членство.
Иако Германија официјално поддржува полноправно членство на Украина, идејата не беше добро примена во Киев. Украинскиот претседател Володимир Зеленски порача дека Украина прифаќа само целосно членство во ЕУ.
Европските лидери ќе разговараат за предлогот на состаноците во јуни, додека аналитичарите оценуваат дека дебатата ја открива сè поголемата неподготвеност на дел од европските престолнини за ново проширување на Унијата.
