Пронајдени телата на четворица италијански нуркачи исчезнати на Малдивите

Телата на четворица италијански нуркачи кои минатата недела исчезнаа за време на нуркачка несреќа на Малдивите се пронајдени, потврдија италијански и малдивски претставници за Би-би-си.Телото на петтиот член на групата беше пронајдено уште претходно, по несреќата што се случила во четвртокот.Италијанските државјани биле пронајдени во пештера на длабочина од околу 60 метри во атолот Вааву, благодарение на заедничка акција на специјално обучени фински и малдивски нуркачи, соопштија локалните власти.За време на потрагата загинал и еден спасувачки нуркач.„Во следните денови ќе бидат изведени дополнителни нуркања за извлекување на телата“, изјави портпаролот на малдивската влада, Мохамед Хосеин Шариф.Се верува дека ова е најтешката поединечна нуркачка несреќа во оваа островска држава во Индискиот Океан, која е позната туристичка дестинација по своите корални острови.Жртвите се идентификувани како вонредната професорка по екологија на Универзитетот во Џенова, Моника Монтефалконе, нејзината ќерка Џорџа Сомакал, морскиот биолог Федерико Гуалтиери, истражувачката Муриел Оденинo и инструкторот по нуркање Џанлука Бенедети.Телото на Бенедети било пронајдено во четвртокот во близина на влезот во пештерата, а властите веруваат дека останатите четворица нуркачи влегле во неа. Причината за смртта сè уште се истражува.Спасувачкиот нуркач Мохамед Махуди, припадник на Националните одбранбени сили на Малдивите, починал од декомпресиска болест, откако во саботата бил префрлен во болница во главниот град.Тој бил погребан со воени почести на церемонија на која присуствувал и претседателот на Малдивите, Мохамед Муизу.Италијанскиот министер за надворешни работи, Антонио Тајани, изјави дека ќе биде направено сè за телата на жртвите да бидат вратени во Италија, а истовремено изрази сочувство поради смртта на спасувачот.Лошите временски услови во текот на целата акција значително ја отежнувале потрагата и спасувањето.Италијанската туристичка агенција што го организирала нуркачкото патување ги отфрли обвинувањата дека одобрила или знаела за длабинско нуркање што ги надминувало локалните ограничувања.Рекреативното нуркање на Малдивите е ограничено на длабочина од 30 метри.Универзитетот во Џенова соопшти дека Моника Монтефалконе и Муриел Оденино престојувале на Малдивите како дел од официјална научна мисија за следење на морската средина и проучување на влијанието на климатските промени врз тропската биолошка разновидност.Сепак, нуркањето при кое се случила трагедијата не било дел од планираното истражување, туку било организирано приватно.

Свет | пред 2 дена

Филипче на Х: „Промакедонската“ партија на Мицкоски, во која половина имаат бугарски пасоши, не сака да биде македонска

Претседателот на СДСМ, Венко Филипче, преку објава на социјалната мрежа X упати критики кон ВМРО-ДПМНЕ и лидерот Христијан Мицкоски.Во објавата, Филипче тврди дека дел од функционерите на ВМРО-ДПМНЕ поседуваат бугарски пасоши и ја обвини партијата за лицемерие во однос на прашањата поврзани со Уставот и евроинтеграциите.„Уште еден доказ дека „промакедонската“ партија на Мицкоски, во која половина имаат бугарски пасоши, всушност не сака да биде македонска. Може целата Влада да биде составена од бугарски државјани, ама не може малцинствата да влезат во Уставот. Доста е со вашите лаги. Граѓаните јасно велат: Сакаме ЕУ!“, напиша Филипче на X.

Македонија | пред 2 дена

Иран разгледува нов модел за управување со Ормутскиот теснец

Иран разгледува модел за управување со Ормутскиот теснец преку продажба на осигурителни услуги, со цел да воспостави рамнотежа меѓу поствоената контрола усогласена со меѓународното право и економската корист, објави иранската новинска агенција „Фарс“.Според извештајот, иранското Министерство за економија подготвува план што би овозможил управување со Ормутскиот теснец преку систем на осигурување.Моделот, како што се наведува, би бил прифатлив за други држави во мирнодопски услови, а на Иран би му овозможил контрола врз теснецот. Според документот на кој се повикува „Фарс“, Техеран би обезбедил „информациска доминација“ и би можел да ги разликува бродовите од различни држави што транзитираат низ Ормутскиот теснец.Иран, по американско-израелските напади, ја презеде контролата врз теснецот и забрани транзит за бродови поврзани со Соединетите Американски Држави, Израел и нивните сојузници. Бродовите на „пријателските“ земји, пак, го координираат минувањето со иранската морнарица.Техеран порача дека безбедноста на Ормутскиот теснец е во надлежност на иранските вооружени сили и дека управувањето со теснецот трајно ќе остане во рацете на Иран, поради штетите што земјата ги претрпела од минувањето на непријателски бродови.Во меѓувреме, Иран подготвил два модели за управување со теснецот по завршувањето на војната.Првиот модел предвидува наплата на транзитни такси и продажба на услуги за бродови во мирнодопски услови, како што е пилотирање при пловидба. Според „Фарс“, таквиот пристап би бил усогласен со меѓународното право, но би носел политички последици за Иран.Со овој модел, приходите на Иран би биле ограничени на продажба на услуги и, во најдобар случај, би достигнале до две милијарди долари.Вториот модел, подготвен од Министерството за економија, предвидува продажба на широк спектар поморски осигурителни полиси и потврди за финансиска одговорност.Во почетната фаза, планот предвидува продажба на осигурување од инспекции, задржување и заплена на бродови, но без покривање штети од вооружени напади.Според процените на „Фарс“, овој модел, доколку ризикот остане низок, би можел да му донесе на Иран приходи поголеми од десет милијарди долари.

Свет | пред 2 дена

Задар воведува „скен-возило“ за откривање непрописно паркирање

Градот Задар од понеделник воведува во сообраќај таканаречено „скен-возило“, кое ќе врши надзор на сообраќајни прекршоци како непрописно паркирање и запирање на возила на повеќе од десет локации означени како „црни сообраќајни точки“.„Со воведувањето на скен-возилото сакаме да постигнеме подобар комунален ред. Се насочивме кон локации каде што често се случуваат прекршоци и кои претставуваат најголема закана за безбедноста, а токму на нив нè предупредуваа граѓаните“, изјави градоначалникот Шиме Ерлиќ.Возилото на покривот има систем за скенирање со шест камери, по три од двете страни на автомобилот, кои ја снимаат предната, страничната и задната страна на паркираните возила, а системот може да функционира и во текот на ноќта.„Градот со овој систем продолжува да инвестира во помодерни решенија и подобра организација за комуналниот ред и сообраќајот да функционираат поквалитетно“, додаде Ерлиќ, нагласувајќи дека целта не е казнување, туку безбедност на сите учесници во сообраќајот, со посебен акцент на пешаците.Скен-возилото ќе ја контролира состојбата со паркирањето така што ќе ги евидентира непрописно паркираните автомобили, а информациите веднаш ќе ги испраќа до сообраќајното редарство.Во соработка со Министерството за внатрешни работи и задрската полиција, покрај скен-возилото, ќе бидат активирани и нови камери за видеонадзор на неколку градски сообраќајници.Во текот на едномесечната тест-фаза, новите камери регистрирале 1.263 сообраќајни прекршоци.

Балкан | пред 2 дена

Русија ги повика САД да се приклучат на мировните преговори со Украина

Русија очекува продолжување на мировните преговори за завршување на војната во Украина и ги повикува Соединетите Американски Држави да се вклучат во процесот, изјави портпаролот на Кремљ, Дмитриј Песков, пренесуваат руските агенции РИА Новости, РБК и ТАСС.Песков потсети дека мировниот процес моментално е „во застој“.„Сепак, очекуваме преговорите да продолжат и нашите американски колеги во таа насока да вложат мировни и посреднички напори“, изјави тој.Портпаролот на Кремљ повторно тврдеше дека Русија во Украина гаѓа „само воени или речиси воени цели“, а истовремено обвини дека украинските вооружени сили напаѓаат инфраструктурни објекти на руска територија.Преговарачкиот процес речиси целосно е запрен од крајот на февруари и почетокот на судирите меѓу Соединетите Американски Држави и Израел од една страна и Иран од друга страна.Најавената посета на преговарачите на Доналд Трамп на Киев „по Велигден“ не беше реализирана.Украинскиот претседател Володимир Зеленски на крајот на април изјави дека Украина е подготвена за нова рунда мировни преговори со Русија во трилатерален формат.Потоа, на 14 мај, Зеленски порача дека очекува деблокада на преговорите и интензивирање на дипломатијата.

Свет | пред 2 дена

(Видео) Мјаукање во Собраниe: Министрите и понатаму може да имаат двојни државјанства, власта не ги поддржа измените

Владејачкото мнозинство не ја поддржа потребата од измени на Законот за Влада со кои министрите би можеле да имаат само македонско државјанство.За предлогот на СДСМ гласаа 20 опозициски пратеници, додека немаше гласови „против“ ниту „воздржани“. За време на гласањето, во собраниската сала се слушало мјаукање.СДСМ предложи измените да се носат по скратена постапка, а образложението го даде координаторот на пратеничката група, Оливер Спасовски.Тој рече дека предлогот е поврзан со иницијативата на ВМРО-ДПМНЕ за пратениците да имаат само македонско државјанство.„Пратеничката група на СДСМ предложи законот да биде компатибилен со законското решение за пратеници, односно членовите на владата да имаат само едно државјанство, државјанство на Македонија“, рече Спасовски.Според него, ако се бара пратениците да имаат само македонско државјанство, тогаш истото правило треба да важи и за министрите.„Пратениците во македонското собрание можат да бидат исклучиво државјани на Република Северна Македонија, тогаш сходно на тоа, треба да имаме и едно вакво законско решение со коешто ќе ограничиме практично да може исклучиво и единствено само државјаните на Република Северна Македонија да бидат членови избрани за влада“, изјави Спасовски.Тој посочи дека во Владата има министри со повеќе државјанства и ја спомена министерката за енергетика Сања Божиновска.„Сега гледаме бугарски државјанства, чешки државјанства и така натаму, тоа е нешто што имаме официјално за членовите на владата и коишто и овде пред собранието тоа го имаат потврдено, зборувам конкретно за министерката за енергетика Сања Божиновска“, рече Спасовски.Тој изрази очекување дека владејачкото мнозинство ќе го поддржи предлогот, но тоа не се случи.

Македонија | пред 2 дена

Вучиќ: Србија и Азербејџан ќе соработуваат на изградба на гасна електрана во Ниш

Претседателот на Србија, Александар Вучиќ, престојува во Баку, каде што денеска започна 13. Светски урбан форум.„Во време на немилосрдни климатски промени, решението е инвестирање во декарбонизација и премин кон обновлива енергија. Многу светски градови се соочуваат со голем проблем со загадувањето“, изјави Вучиќ.Тој посочи дека во Белград е воведен бесплатен јавен превоз и дека Србија очекува користење електрични автобуси.„Нè радува и соработката со Азербејџан за изградба на гасна електрана во Ниш во иднина. Имаме два суперкомпјутери и трет што ќе пристигне во Крагуевац, а тоа значи дека Србија мора да го зголеми производството на енергија – нуклеарна, но се потпираме и на гасот од Азербејџан, и тоа ќе биде клучно“, рече српскиот претседател.Тој додаде дека неодамна бил усвоен закон за легализација на објекти.„Градовите се средина каде што се поттикнуваат иновативноста и унапредувањето на секојдневниот живот“, изјави Вучиќ.Говорејќи за Експо 2027, тој истакна дека Србија, како домаќин, ќе обезбеди платформа за повеќе од 140 држави од светот.„Ќе дадеме можност да се претстават конкретни иновативни решенија, а тоа вклучува и нови генерации паметни летала и авиони“, заклучи Вучиќ.Светскиот урбан форум ќе трае до 22 мај на стадионот „Баку олимписки стадион“, под мотото „Домување во светот: Безбедни и отпорни градови и заедници“, во организација на УН-Хабитат.Форумот се смета за еден од најзначајните глобални собири посветени на иднината на градовите, урбанизацијата и одржливиот развој.

Балкан | пред 2 дена

Ново поскапување на горивата: Бензините и дизелот од полноќ поскапи до 2,5 денари

Регулаторната комисија за енергетика донесе одлука за ново зголемување на цените на нафтените деривати, при што во просек цените растат за 1,84 проценти во однос на претходната одлука.Од 19 мај 2026 година од 00:01 часот, бензините и дизелот ќе се продаваат по повисоки цени.Согласно новата одлука, ЕУРОСУПЕР БС-95 ќе чини 87 денари за литар, ЕУРОСУПЕР БС-98 ќе се продава по 89 денари, додека цената на дизелот ЕУРОДИЗЕЛ БС (Д-Е V) ќе изнесува 92 денари за литар.Цената на екстра лесното масло за домаќинство ќе изнесува 93,5 денари за литар, а мазутот М-1 НС ќе се продава по 50,814 денари за килограм.„Малопродажната цена на бензинот ЕУРОСУПЕР БС-95 се зголемува за 2,00 ден/лит, додека малопродажните цени на бензинот ЕУРОСУПЕР БС-98 и на ЕУРОДИЗЕЛ (Д-Е V) се зголемуваат за 2,50 ден/лит“, соопшти РКЕ.Единствено намалување има кај екстра лесното масло за домаќинство, чија цена се намалува за 0,50 денари по литар.Од Регулаторната комисија посочуваат дека промените се резултат на движењата на светските пазари.„Референтните цени на нафтените деривати на светскиот пазар во споредба со претходната пресметка бележат зголемување и тоа во просек: кај бензините за 4,961%, кај дизелот за 0,295%, кај мазутот за 14,450%“, наведуваат од РКЕ.Од Комисијата потсетуваат дека ова се максимални цени и трговците можат да продаваат и по пониски цени.

Македонија | пред 2 дена

Песков ги отфрла обвинувањата дека Русија би го нападнала НАТО преку Белорусија

Кремљ денеска ги отфрли тврдењата на украинскиот претседател Володимир Зеленски дека Русија разгледува можност за напад врз некоја членка на НАТО од територијата на Белорусија.Зеленски во петокот изјави дека Русија се обидува подлабоко да ја вовлече Белорусија во војната во Украина и дека разгледува планови за напад врз северниот дел на Украина или врз некоја земја членка на НАТО од белоруска територија.„Таквата изјава не е ништо друго освен обид за дополнително поттикнување тензии со цел продолжување на војната и ескалација. Не сметаме дека таквата изјава заслужува каков било коментар“, изјави портпаролот на Кремљ, Дмитриј Песков.Белорусија на југ граничи со Украина, а на север и запад со членките на НАТО – Полска, Литванија и Летонија.Властите во Минск ѝ дозволија на Русија да ја користи белоруската територија како појдовна точка за инвазијата врз Украина во 2022 година, а во земјата е распоредено и руско тактичко нуклеарно оружје.Белоруското Министерство за одбрана денеска соопшти дека вооружените сили на земјата, во соработка со Русија, започнале воена вежба за проверка на подготвеноста за распоредување нуклеарно оружје.Во соопштението се наведува дека вежбата не е насочена против ниту една држава и не претставува безбедносна закана за регионот.

Свет | пред 2 дена

Левица со предлог-закон за ставање крај на кризата со коцкање

Политичката партија Левица ќе поднесе предлог-закон со кој се предвидуваат строги ограничувања за коцкањето и рекламирањето на игрите на среќа, најави пратеникот Амар Мециновиќ на денешната прес-конференција.Според најавените законски измени, казината и автомат клубовите би можеле да работат само во граничен појас до пет километри од границата или во категоризирани хотели со пет ѕвезди.Мециновиќ изјави дека институциите треба да покажат дека заштитата на човечкото достоинство, семејната стабилност и иднината на младите се поважни од профитот на коцкарската индустрија.„Прашањето е дали ќе дозволиме цели населби да бидат преплавени со индустрија која заработува од надежта, стравот и економската несигурност на граѓаните во време кога опаѓаат условите на живот“, изјави Мециновиќ.Тој оцени дека коцкањето долго време не било сериозно отворено како тема во Собранието и додаде дека коцкарската индустрија профитира од сиромаштијата и економската несигурност на граѓаните.Според Мециновиќ, со предложените измени се отвора можност државата да покаже дека знае да ги заштити своите граѓани.Од Левица најавуваат и ограничување на рекламирањето на коцкањето, со цел да се спречи, како што велат, „агресивната нормализација“ на игрите на среќа во јавниот простор.

Македонија | пред 2 дена

Во живо на социјална мрежа промовирал омраза и насилство: струмичанец доби кривична пријава

СВР Струмица поднесе кривична пријава против 39-годишен жител на струмичкото село Просениково поради сомнение дека ширел расистички и ксенофобичен материјал преку социјална мрежа.Од МВР информираат дека пријавениот се товари за кривичното дело „ширење на расистички и ксенофобичен материјал по пат на компјутерски систем“.„СВР Струмица поднесе кривична пријава против Р.Т.(39) од с.Просениково, струмичко, поради постоење основи на сомнение за сторено кривично дело „ширење на расистички и ксенофобичен материјал по пат на компјутерски систем““, велат од полицијата.Според пријавата, на 9 март 2026 година, тој преку свој профил на социјална мрежа се вклучил во живо и јавно поттикнувал омраза и насилство.„На 09.03.2026, пријавениот преку негов профил на социјална мрежа се вклучил во живо, при што во јавноста промовирал и поттикнувал омраза и насилство“, соопшти МВР.

Македонија | пред 2 дена

Пијан возач излетал од патот во Охрид, завршил со тешки повреди

22-годишен возач од Охрид се здобил со тешки телесни повреди откако со автомобил излетал од патот на улицата „7 Ноември“ во Охрид.Од МВР информираат дека несреќата била пријавена рано утрово.„На 18.05.2026 во 05:25 часот во СВР Охрид е пријавено дека на ул.„7 Ноември“ во Охрид, патничко возило „цитроен“ со охридски регистарски ознаки, управувано од И.Р.(22) од Охрид, изгубило контрола и излетало од патот“, велат од полицијата.Во несреќата возачот се здобил со тешки телесни повреди, констатирани во Специјалната болница „Свети Еразмо“ во Охрид.При извршените проверки, полицијата утврдила дека возачот бил под дејство на алкохол.„Било констатирано дека И.Р. го управува под дејство на алкохол, односно дека има 1,61 промили алкохол во крвта“, соопшти МВР.По наредба на јавен обвинител, увид на местото извршила увидна екипа на СВР Охрид.

Македонија | пред 2 дена

Тинејџерка ограбена и заплашувана од група малолетници во Скопје

40-годишен жител на Скопје пријавил во полиција дека неговата малолетна ќерка била ограбена и заплашувана од група малолетници на подрачјето на Чаир.Според пријавата, инцидентот се случил на 7 мај околу 08:00 часот.„На 17.05.2026 во 19:30 во СВР Скопје, Ф.М.(40) од Скопје пријавил дека на 07.05.2026 околу 08:00 часот на подрачјето на Чаир, неколку малолетници со закана со остар предмет од неговата 16-годишна ќерка одзеле пари“, велат од МВР.Тој пријавил и дека малолетниците ѝ се заканувале оти повторно ќе мора да им дава пари и во наредните денови.Од полицијата информираат дека се преземаат мерки за расчистување на случајот.

Скопје | пред 2 дена

Инцидент во трговски центар: Нападнат 16-годишник, повреден и маж кој се обидел да го одбрани

Полицијата постапува по случај на физички напад меѓу малолетници во трговски центар на подрачјето на Аеродром, при што бил нападнат и 25-годишен маж кој се обидел да интервенира.Од МВР информираат дека на 17 мај 2026 година во 13:50 часот, 36-годишна жена од Скопје пријавила дека нејзиниот 16-годишен син бил нападнат претходната вечер.„36-годишната М.Б. од Скопје пријавила дека на 16.05.2026 околу 22:30 часот пред продажно место во трговски центар на подрачјето на општина Аеродром во Скопје, нејзиниот 16-годишен син бил физички нападнат од друг 16-годишен малолетник, кој употребил тврд предмет“, соопшти полицијата.Според пријавата, напаѓачот потоа физички го нападнал и 25-годишниот М.Д. од Скопје, кој се обидел да го заштити малолетникот.И самиот М.Д. подоцна го пријавил настанот.„На 17.05.2026 во 11:45 часот, М.Д.(25) од Скопје пријави дека на 16.05.2026 околу 22:30 часот во трговски центар на подрачјето на општина Аеродром во Скопје бил физички нападнат од 16-годишник, додека бранел друг малолетник“, велат од МВР.За случајот е известен јавен обвинител за малолетници, а полицијата презема мерки за расчистување на настанот.

Скопје | пред 2 дена

Инцидент во скопска игротека: Мајка пријавила дека жена го турнала нејзиниот син

31-годишна скопјанка пријавила во полиција дека нејзиниот четиригодишен син бил турнат во игротека на подрачјето на Карпош.Од МВР информираат дека случајот бил пријавен на 17 мај 2026 година околу 22:30 часот.„31-годишата Г.П.Г. од Скопје пријавила дека околу 16:10 часот во игротека на подрачјето на Карпош, нејзиниот четиригодишен син бил турнат од В.Д. - мајка на негово другарче“, велат од полицијата.Од МВР додаваат дека се преземаат мерки за расчистување на случајот.

Скопје | пред 2 дена

Мицкоски, Касами и Меџити разговарале за полагањето правосуден испит на албански: Се бараат решенија

Претседателот на Владата, Христијан Мицкоски, денеска одржал работна средба со копретседателите на коалицијата ВЛЕН, Билал Касами и Изет Меџити, на која се разговарало за употребата на јазиците при полагањето на правосудниот испит.Од Владата соопштија дека на средбата бил нагласен заедничкиот пристап за изнаоѓање решение.„Беше нагласено дека само преку заеднички, мудар и достоинствен пристап може да се дојде до решенија кои ќе значат напредок, меѓусебна доверба и заедничко чекорење кон иднината“, соопшти Владата.Според соопштението, соговорниците се согласиле дека образованието и знаењето се основа за развој на државата.„Соговорниците се согласија дека образованието и знаењето претставуваат темел на секоја современа и успешна држава“, се наведува во соопштението.Од Владата додаваат дека институциите работат на решение кое ќе биде во согласност со Уставот и законите.„Институциите активно работат на изнаоѓање на решенија кои ќе бидат целосно усогласени со Уставот и со Законот за употреба на јазиците, со цел обезбедување правна сигурност и функционалност“, информираат од Владата.

Македонија | пред 2 дена

Скопјанец приведен во Карпош откако бил агресивен кон полицајци

Полициски службеници од СВР Скопје привеле 30-годишен скопјанец на подрачјето на Карпош, откако агресивно се однесувал кон полицијата при вршење службени дејствија.Од МВР информираат дека приведувањето се случило на 17 мај 2026 година околу 08:30 часот.„На 17.05.2026 во 08:30 часот во Скопје, на подрачјето на Карпош, полициски службеници од СВР Скопје го приведоа М.В. (30) од Скопје затоа што се однесувал агресивно кон полициски службеници додека вршеле службени дејствија“, соопшти полицијата.По целосно документирање на случајот ќе следува соодветен поднесок.

Македонија | пред 2 дена

Жена пријавила дека била претепана од сопругот во семејниот дом

46-годишна жена од Скопје пријавила во полиција дека била физички нападната од нејзиниот сопруг во семејниот дом.Од МВР информираат дека случајот бил пријавен утрово во 06:00 часот.„На 18.05.2026 во 06:00 часот во СВР Скопје, 46-годишна жена од Скопје пријави дека на 17.05.2026 околу 23:00 часот во семејниот дом, по претходна расправија, била физички нападната од нејзиниот 57-годишен сопруг“, велат од полицијата.Со сопругот бил извршен службен разговор, а по целосно документирање на случајот ќе следува соодветна пријава.

Македонија | пред 2 дена

Семејна тепачка во скопско: Сестрата пријавила напад, братот тврди дека и тој бил нападнат

Физичка пресметка меѓу брат и сестра била пријавена вчера во Скопје, информира Министерството за внатрешни работи.Според полицијата, на 17 мај 2026 година околу 12 часот, 21-годишна девојка од Скопје пријавила дека половина час претходно, по расправија во семејниот дом во скопско, била физички нападната од нејзиниот 23-годишен брат.„На 17.05.2026 во 12:00 часот во СВР Скопје, 21-годишна жена од Скопје пријави дека околу 11:30 часот во семејниот дом во скопско, по претходна расправија, била физички нападната од нејзиниот 23-годишен брат, по што му возвратила“, велат од МВР.Подоцна истиот ден, околу 21:30 часот, и братот пријавил напад.„23-годишникот пријави дека по претходно недоразбирање, бил физички нападнат од неговата 21-годишна сестра, по што ѝ возвратил“, соопшти полицијата.Од МВР додаваат дека бил извршен службен разговор со 23-годишникот и дека по целосно документирање на случајот ќе следува соодветна пријава.

Македонија | пред 2 дена

Жена пронајдена мртва во стан во Аеродром, телото дадено на обдукција

Од МВР информираат дека случајот бил пријавен денеска околу 11 часот.„На 17.05.2026 во 11:00 часот во СВР Скопје, З.К.(41) од Скопје пријави дека околу 10:30 часот во стан на подрачјето на општина Аеродром во Скопје ја пронашол почината неговата 46-годишна сестра З.К. од Скопје“, соопшти полицијата.По насоки на јавен обвинител, телото на починатата е предадено на обдукција, по што ќе бидат познати причините за смртта.

Македонија | пред 2 дена

Пациентите предупредуваат: Комисија не смее да одлучува кој ќе биде опериран

Здружението на кардиоваскуларни пациенти остро реагира на најавите на Министерството за здравство за воведување национална листа за кардиолошки операции и формирање стручен тим што ќе ги разгледува сложените случаи, оценувајќи дека ваквиот модел може повторно да создаде административни пречки и неизвесност за пациентите.Реакцијата следува по изјавите на министерот за здравство Азир Алиу, кој најави ревизија на протоколите за лекување и формирање Национален тим составен од девет члена – шест од јавните и тројца од приватните здравствени установи.„Нашата цел е овој процес да заврши со нови системски правила и нови механизми за контрола за поголема сигурност на пациентите. Отпочнуваме со процесот на ревидирање на протоколите за постапување со пациентите“, изјави Алиу.Според министерот, тимот ќе се состанува редовно и ќе ги разгледува сложените и граничните случаи кога е потребна дополнителна стручна проценка.Тој најави и формирање национална листа за кардиолошки операции, со цел подобра контрола и увид во интервенциите, нивната оправданост и редоследот на упатување.„Итните случаи и натаму ќе бидат приоритет“, рече Алиу.Од здружението на кардиоваскуларни пациенти сметаат дека ваквиот пристап може да доведе до одложување на интервенциите и ограничување на правата на пациентите.„Како кардиоваскуларни пациенти и директно засегнати од квалитетот, достапноста и навременоста на кардиоваскуларните услуги во државата, јавно предупредуваме дека последните најави за формирање комисија или стручно тело кое ќе одредува кој, каде и кога ќе се оперира, претставуваат сериозен чекор назад во заштитата на правата на пациентите“, наведуваат од здружението.Оттаму посочуваат дека стручниот надзор и контролата се неопходни, но не и модел во кој комисија ќе ја презема одлуката од пациентот и лекарот.„Во кардиоваскуларната медицина времето често значи живот. Секое непотребно чекање, секое дополнително одобрување и секоја административна пречка може да има непоправливи последици“, предупредуваат пациентите.Во реакцијата тие потсетуваат и на искуства од минатото, кога, според нив, слични комисии носеле субјективни и нетранспарентни одлуки.Од здружението бараат Министерството за здравство да воспостави транспарентен систем на контрола и отчетност, без ограничување на правото на избор на пациентите и лекарите.

Македонија | пред 2 дена

„Уште едно признание на ВМРО-ОКГ дека се со бугарски пасоши, го одбија законот за двојни државјанства на СДСМ“, велат од СДСМ

Од СДСМ денеска преку соопштение обвинија дека ВМРО-ДПМНЕ го одбило предлог-законот со кој министрите, вицепремиерите и членовите на Владата не би можеле да поседуваат двојни државјанства.Во партиското соопштение, СДСМ тврди дека ваквиот потег претставува, како што наведуваат, „признание“ дека дел од функционерите на ВМРО-ДПМНЕ поседуваат бугарски државјанства.Од партијата повторно ги отворија прашањата поврзани со Преспански договор, наведувајќи дека ВМРО-ДПМНЕ со текот на времето го прифатило договорот, како и членството на државата во НАТО.„Со години ширеа хистерија, страв и лаги дека некој ќе го избрише македонскиот идентитет, а денес токму тие – со бугарски пасоши во џебовите“, се наведува во реакцијата на СДСМ.Партијата обвини и дека функционери на ВМРО-ДПМНЕ ја блокираат европската интеграција на државата, додека истовремено, според нив, обезбедиле бугарски пасоши.Во соопштението СДСМ наведе повеќе имиња на актуелни и поранешни функционери, меѓу кои Антонио Милошоски, Сања Божиновска, Стефан Андоновски и Александар Пандов, тврдејќи дека поседуваат бугарски државјанства.Од СДСМ велат дека одбивањето на законот, според нив, ја покажува „лицемерната политика“ на ВМРО-ДПМНЕ во однос на прашањата поврзани со Бугарија и европските интеграции.

Македонија | пред 2 дена

„Семејствата сами се борат за лекови, СДСМ предлага проширување на позитивната листа“, вели Лукаревска

Пратеничката на СДСМ, Сања Лукаревска, на собраниска седница повика на поголема медицинска поддршка за децата со попреченост и лицата со ретки болести преку измени во Законот за здравствено осигурување.Таа истакна дека предложените измени предвидуваат формирање посебна позитивна листа на лекови и суплементи, како и проширување и ревидирање на правото на ортопедски и индивидуални помагала.„Со предложените измени ќе се овозможи редовно и континуирано следење на здравствените потреби на овие лица, намалување на финансискиот товар врз семејствата и обезбедување правична и навремена здравствена услуга“, рече Лукаревска.Според неа, целта на измените е подобрување на квалитетот на живот и реална инклузија на децата со попреченост, бидејќи постојниот систем, и покрај постоењето на позитивна листа и ортопедски помагала, не ги задоволува реалните потреби на пациентите.„Досегашната пракса покажува дека постојниот систем не ги следи реалните потреби на корисниците и не обезбедува еднаков пристап до неопходната здравствена поддршка“, посочи таа.Лукаревска нагласи дека голем број семејства се принудени сами да обезбедуваат терапии и медицинска поддршка, што создава сериозен финансиски товар.„Поради тоа, семејствата често се принудени самостојно да ги обезбедуваат потребните терапии, што претставува сериозен финансиски товар и создава нееднаквост во пристапот до здравствена заштита“, рече Лукаревска.Таа се осврна и на проблемите со ортопедските и индивидуалните помагала, оценувајќи дека законските ограничувања не ги следат реалните потреби на пациентите.„Во пракса, тоа доведува до ситуации во кои детето користи несоодветно или дотраено помагало, затоа што не е исполнет законскиот рок за негово обновување“, истакна Лукаревска.Според неа, предложените измени се темелат на четири клучни постулати – проширување на позитивната листа, ревидирање на критериумите, зголемување на опфатот на помагала и почесто обновување на потребната опрема.

Македонија | пред 2 дена

Билал Касами најави правосуден испит и на албански јазик

Градоначалникот на Тетово и лидер на БЕСА, Билал Касами, најави дека правосудниот испит наскоро ќе може да се полага и на албански јазик.Во кратка објава на социјалните мрежи, Касами напиша:„Правосуден испит и на албански јазик! Наскоро со добри вести…“Засега нема дополнителни детали за тоа дали станува збор за законски измени, владина иницијатива или конкретен предлог што ќе биде доставен до институциите.

Коментари | пред 2 дена

Паната му ја предаде „штафетата“ на Синер: Те чекам и во Париз

Јаник Синер го освои Мастерсот во Рим и стана првиот Италијанец по Адријано Паната во 1976 година кој го кренал трофејот на „Форо Италико“.Токму легендарниот Паната му го врачи пехарот на најдобриот светски тенисер на церемонијата по финалето, а потоа откри и емотивен разговор што го имале двајцата.„Педесет години се долг период и пресреќен сум поради ова. Рим толку долго чекаше шампион како Синер“, изјави Паната за „Газета дело Спорт“.Легендарниот Италијанец призна дека му значи тоа што токму тој му го предал трофејот на својот наследник.„Сакав да му ја предадам таа позната штафета, бидејќи зборуваме за Јаник Синер, најдобриот играч во светот. За мене тоа е огромна гордост“, рече Паната.Тој особено емотивно зборуваше за Централниот терен на „Форо Италико“, каде што и самиот испиша историја пред половина век.„На тоа место во 1976 година го доживеав денот што ми го промени животот. Затоа е прекрасно денес да се гледа италијански тенисер кој доминира со ваква личност и ваква игра“, изјави Паната.Поранешниот шампион му порача на Синер дека сака повторно да се сретнат за неколку недели – во Париз, на Ролан Гарос.„Го потсетив дека и јас ќе бидам на Ролан Гарос за да му го врачам трофејот на победникот, бидејќи оваа година се одбележуваат 50 години од мојата титула во Париз. Му реков дека го чекам таму и дека сакам повторно да ја повториме оваа церемонија“, откри Паната.Одговорот на Синер бил краток.„Се надевам“, рекол италијанскиот тенисер.Паната смета дека првиот светски рекет има сè што е потребно за да го освои и Париз.„Може да го направи тоа ако остане смирен“, заклучи легендарниот Италијанец.

Спорт | пред 2 дена