„ВМРО да не бега од законот што самите го најавуваа за ограничување на двојните државјанства за министрите“, вели Спасовски

Пратеничката група на СДСМ поднесе Предлог-закон за измена и дополнување на Законот за Владата, со кој се предвидува членовите на Владата да имаат исклучиво македонско државјанство.Координаторот на пратеничката група на СДСМ, Оливер Спасовски, изјави дека предложеното решение е во согласност со иницијативите што претходно биле отворени во Собранието во врска со измените на Законот за пратеници.Според него, целта е да се воспостават еднакви критериуми за сите избрани и именувани функционери.„Со оглед на тоа што таков услов се поставува и во Законот за пратеници, односно пратениците во македонското Собрание можат да бидат исклучиво државјани на Република Северна Македонија, тогаш, сходно на тоа, треба да имаме едно вакво законско решение со кое практично ќе ограничиме исклучиво и единствено само државјани на Република Северна Македонија да можат да бидат избрани за членови на Владата“, изјави Спасовски.Тој посочи дека граѓаните очекуваат највисоките државни функции да ги извршуваат лица кои имаат единствено македонско државјанство.Спасовски рече дека очекува поддршка од парламентарното мнозинство, потсетувајќи дека власта претходно најавувала брзо донесување на измените на Законот за пратеници, но дека процесот во меѓувреме бил успорен.„Законот за пратеници, еве гледаме сега дека од најголемите најави дека брзо ќе се донесе во Собранието, некако застана тој процес, се успори“, рече Спасовски.Тој додаде дека во јавноста веќе се отворени прашања за поседување странски државјанства од страна на членови на Владата, посочувајќи ја министерката за енергетика Сања Божиновска.„Сега гледаме бугарски државјанства, чешки државјанства итн. Тоа е нешто што го имаме официјално за членовите на Владата и што тие овде, пред Собранието, го имаат потврдено“, изјави Спасовски.

Македонија | пред 2 дена

Финансиска полиција поднесе кривична пријава за даночно затајување од над 7,4 милиони денари

Управата за финансиска полиција поднесе кривична пријава до Основното јавно обвинителство Скопје против две лица и едно правно лице поради сомнение за даночно затајување.Како што соопшти Министерството за финансии, пријавата е поднесена против М.Ш. и Ж.Р., во својство на управители на правното лице, како и против самото правно лице, поради основано сомнение за сторено кривично дело „Даночно затајување“.Според наводите, пријавените во различни периоди свесно и со намера да стекнат противправна имотна корист, избегнувале плаќање даночни обврски.За 2020 година тие доставиле даночен биланс со лажни податоци, додека за 2021 и 2022 година воопшто не поднеле даночни биланси за утврдување данок на добивка, иако тоа било законска обврска.Во соопштението се наведува дека од банкарските сметки на фирмата биле подигнувани парични средства и вршени плаќања кои не биле поврзани со дејноста на правното лице, без соодветна сметководствена документација за нивната оправданост.Дополнително, за да ги прикријат активностите, не биле поднесени завршни сметки за 2022, 2023 и 2024 година до Централниот регистар.Според Финансиската полиција, со ваквите дејствија пријавените не пресметале, не пријавиле и не платиле данок на добивка во износ од 7.200.200 денари и данок на личен доход од 226.123 денари.Со тоа, како што се наведува, Буџетот на државата бил оштетен за вкупно 7.426.323 денари.

Македонија | пред 2 дена

„Предлог-законот за конфискација на имот во граѓанска постапка е клучен чекор во борбата против криминалот и корупцијата“, вели Филков

Министерството за правда денеска одржа стручна јавна расправа за Предлог-законот за конфискација на имот во граѓанска постапка, на која учествуваа претставници на правосудните институции, судии, обвинители, професори, експерти и претставници на меѓународната заедница.Министерот за правда Игор Филков во своето обраќање оцени дека предложеното законско решение претставува значаен чекор во зајакнувањето на владеењето на правото и борбата против криминалот и корупцијата.Тој потсети дека во март 2024 година бил донесен првиот Закон за конфискација на имот во граѓанска постапка, со кој, како што рече, Македонија започнала со воспоставување современ механизам за одземање имот за кој постои сомневање дека е стекнат од незаконски извори, независно од исходот на кривичната постапка.„Низ анализата на постојните законски одредби и консултациите со стручната и академската јавност, институциите и меѓународните партнери, беа утврдени потреби за попрецизно и појасно уредување на повеќе прашања, со цел создавање функционален и правно одржлив систем“, изјави Филков.Според него, новиот Предлог-закон предвидува попрецизно дефинирање на условите за поведување постапка, јасно утврдување на надлежностите на институциите, механизми за финансиска анализа и утврдување несразмерност меѓу имотот и законските приходи, како и мерки за обезбедување на имотот.Министерот нагласи дека законот се темели на принципите на законитост, пропорционалност, непристрасност, доверливост, транспарентност и итност.„Целта не е казнување, туку заштита на јавниот интерес и спречување располагање со незаконски стекнат имот“, истакна Филков.Од Министерството за правда посочуваат дека остануваат посветени на креирање законски решенија за поефикасна борба против незаконското богатење, корупцијата и организираниот криминал, како и за зајакнување на довербата на граѓаните во институциите.

Македонија | пред 2 дена

Американски медиум тврди: Куба поседува руски и ирански дронови, разгледувала можни напади врз базата Гвантанамо

Американскиот медиум „Аксиос“ објави дека Куба располага со повеќе од 300 воени дронови и дека се разговарало за нивна можна употреба за напади врз американската база во заливот Гвантанамо, американски бродови на Карибите и најјужната точка на континенталниот дел на САД.Според извештајот, Куба од 2023 година набавува јуришни беспилотни летала од Иран и Русија. Американските служби, наводно, веруваат дека кубанските разузнавачи се обидувале да проучат како Иран им се спротивставувал на САД во претходни конфликти.„Аксиос“, повикувајќи се на американски разузнавачки податоци, наведува и дека ирански воени советници неодамна престојувале во Хавана.Еден американски функционер изјавил дека загрижува фактот што таква технологија се наоѓа во близина на САД, особено поради поврзаноста на Куба со Иран, Русија и други актери кои Вашингтон ги смета за закана.Во извештајот се наведува и дека Русија и Кина наводно имаат шпионски објекти на Куба за собирање разузнавачки информации.Американски претставници, меѓу другото, проценуваат дека околу 5.000 кубански војници се бореле на страната на Русија во војната во Украина. Дел од нив, по враќањето во земјата, наводно пренеле искуства поврзани со употребата на дронови и современите начини на војување.Куба во моментов се соочува со сериозна економска и енергетска криза. Електричната мрежа во земјата последните денови доживеала делумен колапс, а големи делови од островот остануваат без струја и до 20 часа дневно.Ситуацијата дополнително се влошила откако американскиот претседател Доналд Трамп се закани со санкции за државите што ја снабдуваат Куба со гориво. По тоа, според извештајот, Венецуела и Мексико ги намалиле испораките на нафта.Трамп претходно изјави дека очекува „колапс“ на кубанската власт и порача дека САД сакаат промени во комунистичката влада.Директорот на Централната разузнавачка агенција, Џон Ратклиф, за време на неодамнешната посета на Хавана, наводно пренел порака дека Вашингтон ќе соработува со Куба само доколку властите спроведат „темелни промени“.Американското Министерство за правда, во меѓувреме, планира да поднесе обвинение против Раул Кастро поради наводна вмешаност во нападот од 1996 година врз хуманитарна група.Американските претставници повториле за „Аксиос“ дека Куба нема воена моќ каква што имала за време на кризата во 1962 година, но предупредуваат дека близината до САД и соработката со Русија и Иран предизвикуваат сериозна загриженост во Вашингтон.

Свет | пред 2 дена

„Срамно е СДС да зборува за економија, a токму тие ја оставија државата со празна каса, долгови и највисока инфлација“, велат од ВМРО-ДПМНЕ

Од ВМРО-ДПМНЕ денеска преку соопштение упатија остри критики кон СДСМ, обвинувајќи ја поранешната власт дека зад себе оставила економски проблеми, долгови и висока инфлација.Во партиското соопштение се наведува дека СДСМ нема кредибилитет да зборува за економија, бидејќи, според ВМРО-ДПМНЕ, за време на нивното владеење државата била економски ослабена и соочена со сериозна финансиска криза.Од владејачката партија тврдат дека во периодот на владеење на СДСМ и ДУИ граѓаните живееле со ниски примања, додека инфлацијата достигнала високи нивоа.„Граѓаните живееја со 150 денари на ден, пензиите ги зголемуваа за мизерни 180 денари, платите растеа едвај 5%, додека инфлацијата дивееше со 14%“, наведуваат од ВМРО-ДПМНЕ.Во соопштението се споменува и состојбата во Пошта на Северна Македонија, при што од партијата обвинуваат дека СДСМ оставила вработени без плати и институции во лоша финансиска состојба.ВМРО-ДПМНЕ ја поврза актуелната политичка дебата и со случајот „Мазут“, повторувајќи ги обвинувањата за, како што велат, „обвинителска коалиција“ меѓу одредени обвинители и поранешната власт.Од партијата велат дека актуелната влада работи на економска стабилизација, привлекување инвестиции и зголемување на платите и пензиите.„Македонија конечно се движи напред со одговорните економски политики на ВМРО-ДПМНЕ“, се наведува во соопштението.

Македонија | пред 2 дена

Спор тежок три милијарди евра: „Лукоил“ ја обвинува Бугарија за незаконско преземање

Рускиот нафтен гигант „Лукоил“ бара три милијарди евра отштета од Бугарија, откако државата ја презеде контролата врз локалното работење на компанијата, изјави Румен Спецов, специјален управник задолжен за надзор на бугарскиот имот на групацијата.Барањето е поднесено преку швајцарската трговска подружница „Литаско“, но, според Спецов, сè уште не е конечно.Спорот произлегува од интервенцијата на бугарската држава во работењето на компанијата по назначувањето специјален управник. Претходно годинава, „Лукоил“ најави дека ќе покрене арбитражна постапка против Бугарија пред Меѓународниот центар за решавање инвестициски спорови, обвинувајќи ја Софија за незаконско одземање на имотот на компанијата.Во интервју за бугарската телевизија bTV, Спецов изјави дека евентуалните барања во арбитражната постапка би можеле да се темелат на финансиски показатели, но нагласи дека четирите компании на „Лукоил“ во Бугарија моментално се во одлична финансиска состојба.Законските измени со кои беа проширени овластувањата на специјалниот управник беа усвоени на почетокот на ноември, а на 14 ноември тогашниот директор на Националната агенција за приходи, Румен Спецов, официјално беше назначен на функцијата.Во Бугарија, „Лукоил“ управува со најголемата рафинерија за нафта на Балканот, лоцирана во Бургас, како и со мрежа од 217 бензински пумпи. Компанијата е и најголем производител на авионско гориво во регионот.Годишниот промет на групацијата во Бугарија надминува осум милијарди евра, што претставува значителен удел во бугарската економија, чиј бруто-домашен производ изнесува околу 110 милијарди евра.Одлуката за именување државен управник беше донесена во ноември, по американските санкции што влијаеја врз работењето на „Лукоил“. Подоцна, Вашингтон одобри шестмесечно изземање за деловните активности на компанијата во Бугарија.По парламентарната одлука, „Лукоил“ соопшти дека очекува државниот управник да не ги попречува комерцијалните активности на компанијата, ниту планираната продажба на бугарскиот имот.Од седиштето на компанијата во Москва повеќепати ја опишаа бугарската подружница како „најголем инвеститор и снабдувач со гориво во земјата, главен работодавач и даночен обврзник“, нагласувајќи дека компанијата одржува конструктивен дијалог со локалната заедница и применува високи стандарди за индустриска и еколошка безбедност.Според податоците на руската групација, вкупните инвестиции на „Лукоил“ во Бугарија во изминатите 25 години надминале 4,5 милијарди долари.Спецов изјави дека неговата улога е исклучиво да обезбеди почитување на санкциите што САД ги воведоа врз деловните активности на компанијата.Тој истовремено оцени дека актуелната состојба претставува ретка можност бугарската држава да стекне удел во стратешки важната рафинерија на „Лукоил“ во Бургас.Според него, рафинеријата повеќе не преработува руска сурова нафта. Снабдувањето, како што наведе, сега се врши преку меѓународно признати трговци и производители од Либија, Иран, Казахстан и Азербејџан, врз основа на транспарентни договори.Извозот на гориво на „Лукоил Бугарија“ моментално е предмет на сложен механизам за одобрување во кој учествуваат царинската управа, Министерството за финансии и парламентот.

Балкан | пред 2 дена

(Видео) Израелски сили пресретнаа бродови со хуманитарна помош за Газа

Организаторите на флотилата со хуманитарна помош за Газа денеска соопштија дека израелски сили се качиле на еден од нивните бродови, додека со вториот брод во источниот Медитеран бил изгубен контакт.Претходно, израелското Министерство за надворешни работи преку социјалната мрежа Икс порача дека „нема да дозволи прекршување на законската поморска блокада на Газа“.Бродовите на Глобалната флотила „Сумуд“ испловиле во четвртокот од јужниот дел на Турција, во трет обид да достават помош до Газа, откако претходните мисии биле пресретнати од Израел во меѓународни води.На видео-пренос во живо денеска можело да се види како воени бродови се приближуваат кон пловилата на флотилата.„Воени бродови во моментов ја пресретнуваат нашата флота, а израелските сили се качуваат на нашиот водечки брод, среде бел ден“, објави Глобалната флотила „Сумуд“ на Икс.Од флотилата побараа безбедно минување за, како што наведуваат, нивната законска и ненасилна хуманитарна мисија.Во своето соопштение Израел ги повика сите учесници во акцијата „да го променат курсот и веднаш да се вратат“.Претходната флотила исплови од Шпанија на 12 април, но и таа беше пресретната од израелските сили. Тогаш повеќе од 100 пропалестински активисти биле префрлени на Крит, додека две лица биле задржани во Израел.

Свет | пред 2 дена

Маја Сиванјанам е новата британска амбасадорка во Македонија

Нова амбасадорка на Обединетото Кралство во Македонија ќе биде Маја Сиванјанам, соопшти британската амбасада преку својата Фејсбук-страница.Таа во август годинава ќе ја преземе должноста од актуелниот амбасадор Метју Лосон, кој ја извршуваше функцијата од 2022 година.Според нејзината биографија, Сиванјанам има 25-годишно искуство во дипломатијата и во текот на кариерата извршувала повеќе функции, меѓу кои и служба во британската амбасада во Анкара, Турција.Во периодот од 2023 до 2025 година таа била заменик-директор на Самитот на Европската политичка заедница, кој минатата година се одржа во Лондон.

Македонија | пред 2 дена

Лефков: „Тандемот Коларевиќ и Абази се коалиција во обвинителството, како што се СДС и ДУИ во политиката“

Пратеникот на ВМРО-ДПМНЕ, Миле Лефков, на денешната прес-конференција упати серија обвинувања кон обвинителите Катерина Коларевиќ и Ислам Абази, тврдејќи дека тие дејствувале во интерес на поранешната власт на СДСМ и ДУИ.Според Лефков, „тандемот Коларевиќ и Абази“ функционирал како продолжена рака на политичката коалиција меѓу СДСМ и ДУИ во правосудниот систем.Во своето обраќање, Лефков се осврна и на семејното потекло на обвинителката Катерина Коларевиќ, наведувајќи дека нејзините родители биле избрани на функции од влади предводени од СДСМ и ДУИ.За јавниот обвинител Ислам Абази, Лефков рече дека бил близок до лидерот на ДУИ, Али Ахмети, и дека постапувал според политички насоки.Лефков обвини дека двајцата обвинители го штителе криминалот во случајот „Мазут“, кој според него е вреден 167 милиони евра, и дека не ги процесуирале лицата опфатени во предметот.„Коларевиќ и Абази, застанаа цврсто во одбрана на криминалот на функционерите на СДС и ДУИ наречен „Мазут“ вреден 167 милиони евра“, изјави Лефков.Тој тврдеше и дека обвинителите ги игнорирале извештаите на Државниот завод за ревизија, како и медиумските информации поврзани со квалитетот на мазутот што се користел во ТЕЦ Неготино.Според Лефков, наместо да повикаат релевантни лица од ЕСМ, обвинителите разговарале со лица кои, како што рече, давале искази што им одговарале.Пратеникот на ВМРО-ДПМНЕ праша дали зад запирањето на постапката стои корупција и побара реакција од Советот на јавни обвинители.„Бараме веднаш истрага за овој случај од повисоките инстанци, а оставка на Абази е повеќе од потребна. Правда и одговорност мора да има“, порача Лефков.

Македонија | пред 2 дена

Приведени две лица по обид за напад со нож

Две лица од Гостивар биле приведени рано утринава откако, по претходна расправија, се обиделе да нападнат две лица со остар и тврд предмет, информираат од СВР Тетово.Според полицијата, околу 03:00 часот во Гостивар биле лишени од слобода 47-годишниот С.Ш. и 27-годишниот Ш.Ш., двајцата од Гостивар.Тие се сомничат дека се обиделе да ги нападнат 21-годишниот Л.М. од Прилеп, кој престојувал во Гостивар, и Х.Б. од Гостивар.При преглед кај С.Ш. полицијата пронашла и одзела нож, а по извршеното алкотестирање било утврдено дека тој имал 2,37 промили алкохол во крвта, додека кај Ш.Ш. биле измерени 1,20 промили.Од СВР Тетово велат дека двајцата се задржани во полициска станица и дека по целосно расчистување и документирање на случајот против нив ќе биде поднесена соодветна пријава.

Македонија | пред 2 дена

Одземени повеќе мотоцикли во Тетово и Гостивар, возачите биле без дозвола и под дејство на алкохол

Во рамки на засилените сообраќајни контроли на подрачјето на Тетово и Гостивар, полицијата привела повеќе лица кои управувале мотоцикли без возачка дозвола, а возилата им биле одземени согласно член 297-а од Кривичниот законик за „безобѕирно управување со возило“.Од СВР Тетово информираат дека во текот на 17 мај биле запрени неколку мотоциклисти без дозвола на различни локации во Тетово и Гостивар. Меѓу нив имало и малолетници.Во Тетово, на улицата „Илинденска“, бил запрен 18-годишниот В.А. од селото Камењане, кој управувал мотоцикл со тетовски регистарски ознаки без возачка дозвола.Во Гостивар, на улицата „Браќа Ѓиноски“, полицијата запрела 16-годишен малолетник од Гостивар, додека на улицата „Илинденска“ бил затекнат и 14-годишен малолетник од селото Вруток, кој исто така управувал мотоцикл без дозвола.Дополнително, на улицата „Беличица“ во Гостивар бил запрен 36-годишниот З.П. од Гостивар, а на регионалниот пат Желино–Сиричино бил затекнат и 17-годишен малолетник од Тетово.Полицијата во Тетово го запрела и 25-годишниот К.А. од Тетово, кој управувал мотоцикл без возачка дозвола, додека во Гостивар бил затекнат и 29-годишниот М.Ш. од Гостивар.Од СВР Тетово велат дека сите мотоцикли биле одземени, а по целосно документирање на случаите ќе следуваат соодветни поднесоци.Во одделен случај, рано утринава на улицата „Маршал Тито“ во Тетово, полицијата го привела 43-годишниот Е.И. од Тетово, кој управувал автомобил „ауди“ со 1,58 промили алкохол во крвта, иако му била изречена забрана за управување со возила од Б-категорија.Тој бил задржан во полициска станица, а возилото му било привремено одземено. Против него ќе биде поднесен соодветен поднесок.Неколку часа подоцна, на истата улица, бил приведен и 33-годишниот Н.И. од Тетово, кој управувал автомобил „сеат леон“ без возачка дозвола и со помината регистрација. И во овој случај возилото било одземено, а по документирањето ќе следуваат соодветни пријави.

Македонија | пред 2 дена

Мечка усмрти 10 овци во тетовско Камењане

Мечка усмртила 10 овци во импровизирана штала над тетовското село Камењане, информираат од СВР Тетово.Според пријавата, на 17 мај околу 14:30 часот во Полициското одделение Камењане, 69-годишниот Ф.Р. од селото пријавил дека дивото животно нападнало во местото викано „Душки“, на патот кон селото Јеловјане.Од полицијата соопштија дека увид на местото извршила увидна екипа на СВР Тетово.

Македонија | пред 2 дена

„Уценетиот Филипче е толку антимакедонски настроен и за да се додвори уште повеќе на Бугарија ја славеше нивната победа на Евровизија“, вели Манасиевски

Членот на Централниот комитет на ВМРО-ДПМНЕ, Валентин Манасиевски, на денешната прес-конференција упати серија обвинувања кон лидерот на СДСМ, Венко Филипче, оценувајќи дека неговите ставови и постапки се спротивни на македонските национални интереси.Манасиевски тврдеше дека Филипче ја славел победата на Бугарија на Евровизија, што според него претставува обид за додворување кон официјална Софија.„Филипче први антимакедонец, го достигнува врвот во политиката, и за спас на својата кариера и за да докаже дека е спремен на се за да дојде на власт, славеше победа на соседна држава на Евровизија“, изјави Манасиевски.Тој додаде дека проблемот, според ВМРО-ДПМНЕ, е што државата чија победа ја славел Филипче, како што рече, го негира македонскиот идентитет.Манасиевски обвини дека Филипче не ги осудува навредите што доаѓаат од бугарски политичари и повтори дека СДСМ би ги прифатиле уставните измени и покрај, како што рече, пораките од Софија дека тоа нема да биде последното барање.„Иако од Софија јасно велат дека уставните измени не се последното барање, Филипче уште утре би ги внел Бугарите во Устав, за потоа пак да можат да не блокираат“, рече Манасиевски.Во обраќањето, тој упати и обвинувања дека Филипче е уценет од бугарски политичари поради, како што рече, криминали направени заедно со Зоран Заев.Манасиевски оцени и дека СДСМ бележи пад на политичката поддршка, додавајќи дека Филипче е меѓу политичарите со најниска доверба кај граѓаните и дека партијата може да се соочи со дополнителен пад на следните избори.

Македонија | пред 2 дена

Шукова: „Форумот на жени на СДСМ против омразата и навредите на Миленко и Тасевски, најавува и пријави“

Форумот на жени на СДСМ најави поднесување соодветни пријави поради, како што велат, јавните навреди, понижувања и говорот на омраза кон жени што на социјалните мрежи ги шират Миленко Неделковски и Сашо Тасевски.На прес-конференција, претседателката на Форумот на жени на СДСМ, Каја Шукова, посочи дека реакцијата доаѓа во период кога, според неа, во државата расте насилството врз жените и се случуваат тешки случаи на фемициди.Како последни примери ги посочи нападите и говорот на омраза насочени кон пејачката Каролина Гочева, како и, како што рече, континуираните навреди и омаловажувања кон портпаролката и жените од СДСМ.„Форумот на жени на СДСМ ги осудува и најавува дека ќе поднесе соодветни пријави. Одговорност мора да има“, рече Шукова.Од СДСМ побараа Миленко Неделковски да биде разрешен од функцијата извршен директор на ФК Вардар, додека за Сашо Тасевски побараа санкции и блокирање на неговите видеа на социјалните мрежи.Шукова оцени дека ваквиот говор е резултат на, како што рече, долгогодишна политика на омраза, поделби и пропаганда што ја градела ВМРО-ДПМНЕ, за која употреби и навредлив политички епитет.Според неа, навреди, клевети и говор на омраза се шират кон опозицијата, новинари, активисти и жени кои јавно настапуваат против власта или во име на СДСМ.„Станува збор за организирана кампања на омраза и деградација против неистомислениците. Секој што размислува слободоумно или ја критикува владата е таргет“, изјави Шукова.Таа ја обвини и, како што рече, армијата на ботови на ВМРО-ДПМНЕ за координирано ширење клевети, омаловажувања и закани на социјалните мрежи.Шукова упати критики и до Унијата на жени на ВМРО-ДПМНЕ, оценувајќи дека нивното молчење претставува охрабрување на насилството.„Ова е прашање на достоинство и почит кон жените во нашето општество“, порача таа.Од Форумот на жени на СДСМ истакнаа дека борбата против насилството, омразата и деградацијата на жените ќе продолжи и преку, како што наведоа, Фронтот за вистината и правдата.

Македонија | пред 2 дена

(Видео) Полицијата го транспортира убиецот од Дрниш во канцеларијата на државниот обвинител

Со врзани раце зад грб, полицијата утрово околу 10:30 часот го спроведе Кристијан Алексиќ, осомничен за убиството во Дрниш, во полициско комбе, по што бил пренесен во полициската станица во Шибеник за понатамошна постапка. Во текот на денот се очекува да биде предаден на притворскиот надзорник.Од полицијата рано утринава соопштија дека осомничениот 50-годишник бил уапсен и приведен во службени простории, каде што продолжила криминалистичката истрага.Силни полициски сили од саботата навечер интензивно трагаа по Алексиќ на поширокото подрачје на Дрниш, поради сомневање дека го убил 19-годишниот доставувач на пица Лука М.Според информациите, злосторството се случило во саботата околу 23 часот на терасата од семејната куќа на осомничениот, по што градот бил под засилени полициски мерки. Во текот на потрагата биле затворени сите влезови и излези од Дрниш, а на граѓаните им било препорачано да останат во своите домови.Полицијата објави дека осомничениот бил забележан околу 2:30 часот на приодот кон градот. По брза интервенција, полициските службеници го совладале со употреба на сила и средства за врзување.При претресот кај него биле пронајдени огнено оружје и нож со сечило долго 20 сантиметри. По апсењето бил пренесен во полициската станица, каде што продолжила истрагата.Во акцијата за пронаоѓање на осомничениот бил ангажиран голем број полициски службеници, како и службени кучиња трагачи, хеликоптер и беспилотни летала.

Настани | пред 2 дена

ПОЦ воведува нов систем за паркирање: Повластените карти ќе се издаваат по адреса, бесплатно за прво, надомест за второ и трето возило

Со цел подобро управување со ограничениот паркинг простор и полесен пристап до слободни места за жителите, ЈП за јавни паркилишта на Општина Центар воведува нов систем на паркирање кој предвидува промени во начинот на издавање повластени паркинг карти.Од претпријатието посочуваат дека бројот на возила во Општина Центар постојано расте, додека јавниот простор останува ограничен, особено во населбите Дебар Маало, Капиштец, Буњаковец и во потесното централно подрачје.Една од клучните измени е тоа што повластените паркинг карти повеќе нема да се издаваат по жител, туку по станбена единица, односно по адреса. Според ЈП ПОЦ, досегашниот модел овозможувал едно домаќинство со повеќе пријавени лица да регистрира повеќе возила под повластени услови, што дополнително го оптоварувало паркинг капацитетот.„Паркинг просторот во Центар е ограничен ресурс. Не е реално, ниту фер, јавниот простор неограничено да се користи од едно домаќинство, додека други жители секојдневно се соочуваат со недостиг од слободни места. Дополнително, притисокот врз паркинг просторот постојано расте, бидејќи потребите за користење се сè поголеми, а расположливиот јавен простор останува ограничен. Затоа воведовме систем кој треба да обезбеди поправедна распределба на просторот, побалансирани услови за сите жители и одржливост на системот за паркирање“, велат од претпријатието.Со новите правила, првото возило во домаќинството ќе има бесплатно повластено паркирање, за второто ќе се плаќа 500 денари месечно, додека за третото надоместокот ќе изнесува 1.500 денари.Од ПОЦ објаснуваат дека мерката не е воведена со цел ограничување, туку за воспоставување баланс и поодржливо користење на јавниот простор, како и за намалување на сообраќајниот метеж и непрописното паркирање.„Кога јавниот простор се користи без јасни правила, добиваме нерамномерно користење, непрописно паркирање и дополнителен метеж. Со воведување пофер систем сакаме да создадеме пофункционален градски простор и подобар квалитет на живот за сите граѓани“, додаваат од ПОЦ.Паралелно со реформите, претпријатието најавува инвестиции во нови паркинг места, подобро искористување на постојните капацитети, модернизација и дигитализација на услугите, како и унапредување на инфраструктурата и контролата.Од ЈП ПОЦ порачуваат дека целта е создавање современ и долгорочно одржлив систем за управување со паркирањето, кој ќе овозможи повеќе ред, помал притисок врз јавниот простор и поквалитетно урбано живеење во Центар.

Скопје | пред 2 дена

(Видео) Петнаесетгодишник украл пиштол, па следувале 12 инциденти со оружје во Тексас

Во серија од 12 инциденти со огнено оружје за време на викендот во Остин, во американската сојузна држава Тексас, биле ранети четири лица, а полицијата уапсила двајца малолетници.Началничката на полицијата во Остин, Лиса Дејвис, на прес-конференција изјави дека во притвор се наоѓаат двајца осомничени – момчиња на возраст од 15 и 17 години.„Петнаесетгодишникот во саботата украл пиштол од продавница, по што двајцата украле повеќе од четири возила додека се движеле низ Остин“, изјави Дејвис.Таа, повикувајќи се на соопштение од канцеларијата на шерифот на округот Тревис, додаде дека трет млад човек од хиспаноамериканско потекло избегал од автомобилот непосредно пред апсењето на двајцата малолетници.Локалните власти засега не соопштија повеќе детали за повредените лица и за мотивите зад инцидентите.

Свет | пред 2 дена

„Македонија шеста најсиромашна земја во Европа – Мицкоски раскажува бајки“, велат од СДСМ

Социјалдемократски сојуз на Македонија преку соопштение обвини дека Македонија е шеста најсиромашна земја во Европа, повикувајќи се на податоци објавени од „WorldAtlas“, додека премиерот Христијан Мицкоски, според партијата, „секојдневно раскажува бајки за трета економија во Европа“.Од СДСМ велат дека граѓаните секојдневно се соочуваат со високите цени, намалената куповна моќ и влошениот животен стандард.Партијата во соопштението оцени дека состојбата со Буџетот е „алармантно лоша“ и дека недостигаат средства за повисоки плати, за минимална плата од 600 евра и за мерки за заштита на животниот стандард.Во соопштението се наведува дека има доцнења и во исплатата на плати, посочувајќи го случајот со вработените во Пошта на Северна Македонија.Според СДСМ, Владата се обидува да го покрие недостатокот на средства преку нови задолжувања, при што последното задолжување изнесува 260 милиони евра. Од партијата тврдат дека Владата побарала 300 милиони евра, но банките понудиле помал износ.„Од доаѓањето на власт до денес, Мицкоски го зголеми јавниот долг за 2,5 милијарди евра“, наведуваат од СДСМ, обвинувајќи ја Владата за, како што велат, ризични и неодржливи економски политики.

Македонија | пред 2 дена

(Видео) Патник објави нова снимка од излетувањето на авионот на „Кроација ерлајнс“ во Сплит

На социјалните мрежи се појави нова снимка од патничката кабина на авионот на „Кроација ерлајнс“, кој во саботата при полетување од Сплит за Франкфурт излетал од пистата и завршил на тревната површина покрај неа.Во инцидентот нема повредени, а Агенцијата за истражување на несреќи започна официјална истрага.Главниот истражител за воздухопловни несреќи, Дарко Петрин, изјави дека истрагата е во почетна фаза и дека се спроведуваат обемни технички анализи за да се утврди причината за несреќата.„Авионот од засега непознати причини при полетувањето свртел налево, потоа го напуштил асфалтниот дел од пистата и завршил на тревната површина. Причината за излетувањето допрва треба да се утврди“, изјави Петрин.Тој потврди дека увидот на местото на настанот е завршен, но дека клучните истражни активности, меѓу кои и анализата на податоците од таканаречените „црни кутии“, сè уште траат.Снимачот на податоци за летот и снимачот на разговорите во пилотската кабина веќе се издвоени и се на обработка.Се очекува причината за инцидентот да биде позната за неколку месеци.Петрин нагласи дека никој од патниците и членовите на екипажот не бил повреден.На авионот „Ербас А220-300“ настанале минимални оштетувања, главно на предниот дел од стајниот трап и помали оштетувања на левиот мотор.Во наредните денови ќе бидат извршени разговори со екипажот, а во истрагата ќе бидат вклучени и производителот на авионот и други стручни институции за да се соберат сите релевантни информации.

Настани | пред 2 дена

(Видео) Полицијата објави детали за апсењето на убиецот од Дрниш

Шибенско-книнската полиција објави детали за ноќешното апсење на Кристијан Алексиќ, осомничен за убиството на 19-годишниот Лука М. во Дрниш.Полициските службеници го забележале осомничениот околу 2:30 часот на приодот кон градот Дрниш, по што брзо реагирале и го совладале со употреба на физичка сила и средства за врзување.При прегледот кај 50-годишникот биле пронајдени огнено оружје и нож со сечило долго 20 сантиметри.По апсењето, бил приведен во полициска станица, каде што продолжила криминалистичката истрага.Од полицијата соопштија дека во потрагата бил ангажиран максимален број полициски службеници, а во акцијата биле вклучени и службени кучиња трагачи, хеликоптер и беспилотни летала.Потсетуваме, Алексиќ во саботата вечер го убил доставувачот на храна Лука М. во Дрниш, а потрагата по него траела околу 28 часа.Според информациите на „Далмација Данас“, осомничениот бил уапсен на околу стотина метри од неговата куќа.На местото останале траги од полициската акција, вклучувајќи полициска лента и лисици.Неофицијално, Алексиќ бил уапсен без облека, а наводно зад себе расфрлал бибер во обид да ги измами полициските кучиња трагачи и да го отежне следењето.Жители на Дрниш тврдат дека бегал преку железничката пруга во близина на неговиот дом, каде што, според нивните зборови, има и бункери во кои се обидел да се сокрие.

Настани | пред 2 дена

Авиокомпаниите најпогодени од конфликтот САД – Иран, загубите достигнаа 15 милијарди долари

Компаниите ширум светот досега претрпеле загуби од најмалку 25 милијарди долари поради војната меѓу Соединетите Американски Држави, Израел и Иран, покажуваат анализи на објавени финансиски податоци.Според извештаите, компаниите се соочуваат со растечки трошоци за енергија, нарушени синџири на снабдување и проблеми во трговските патишта поради застојот во Ормускиот Теснец, кој е една од најважните светски рути за транспорт на нафта и гас.Најмалку 279 компании ја посочиле војната како причина за преземање мерки за ублажување на финансиските последици, меѓу кои зголемување на цените, намалување на производството, отпуштања на работници, воведување дополнителни трошоци за гориво и барање државна помош.Меѓу најпогодените се авиокомпаниите, чии загуби достигнале речиси 15 милијарди долари, додека цените на авионското гориво речиси двојно се зголемиле.Една петтина од компаниите опфатени во анализата, од производители на козметика, гуми и детергенти до туристички и транспортни компании, пријавиле директен финансиски удар од конфликтот.Повеќето погодени компании се со седиште во Европа, каде што цените на енергијата остануваат високи, додека значителен дел се и од Азија, поради зависноста од енергентите од Блискиот Исток.Во анализата се наведува и дека до октомври минатата година стотици компании пријавиле дополнителни трошоци од над 35 милијарди долари поради царините воведени од американскиот претседател Доналд Трамп во 2025 година.Очекувањата за остатокот од годината не се оптимистички, бидејќи засега нема значителен напредок кон постигнување договор за прекин на конфликтот.

Свет | пред 2 дена

Скопјани можат да ги подмират долговите за вода на рати без камата до 5 јуни

ЈП Водовод и канализација – Скопје ја информираше јавноста дека е во тек акцијата за отплата на заостанатите долгови без пресметка на камата за задоцнето плаќање.Од претпријатието посочуваат дека акцијата има ограничено времетраење и ќе трае до 5 јуни 2026 година.„Ги повикуваме сите корисници кои имаат заостанат долг за потрошена вода, тужен или редовен, да ја искористат можноста за плаќање на рати без пресметана камата“, наведуваат од претпријатието.Акцијата се однесува на отплата на долговите на рати без камата, а по истекот на рокот одлуката ќе престане да важи.Од ЈП Водовод и канализација – Скопје дополнуваат дека оваа можност не важи за органите на државната и локалната власт, државните институции, агенции, фондови, јавни установи и јавни претпријатија основани од државата или од општините.

Скопје | пред 2 дена

За два дена изречени 1.026 казни, приведени 34 возачи за безобѕирно возење

Министерство за внатрешни работи соопшти дека во текот на изминатите два дена, 16 и 17 мај 2026 година, во рамки на редовните сообраќајни контроли на патиштата низ државата биле издадени вкупно 1.026 платни налози за сторени сообраќајни прекршоци.Од нив, 316 прекршоци се однесувале на непочитување на пропишаната брзина на движење.Поради безобѕирно управување со возило, лишени од слобода биле 34 лица, од кои девет управувале возило под дејство на алкохол, 24 возеле без возачка дозвола, а едно лице управувало возило и покрај претходно изречена забрана.Во истиот период, по член 300-б од Кривичниот законик биле одземени 23 возила.Според статистичкиот преглед на полициските активности, евидентирани биле и 164 прекршоци за непрописно паркирање, како и 29 санкции за возење под дејство на алкохол.Дополнително, санкционирани биле 107 мотоциклисти поради неносење заштитен шлем, пет пешаци, како и 99 учесници во сообраќајот кои не користеле сигурносен појас.Согласно Законот за возила, од сообраќај биле отстранети 15 нерегистрирани возила и четири возила поради техничка неисправност. Санкционирани биле и двајца возачи поради непочитување на прописите за затемнување на стаклата на возилата.Од МВР информираат дека сообраќајните контроли продолжуваат и во наредните денови, со апел до граѓаните да ги почитуваат сообраќајните правила и прописи за поголема безбедност на патиштата.

Македонија | пред 2 дена

Масовност на протестот на студнетите бараат опозициски политичари како Села, убедува преку тезата “албанскиот јазик да е рамноправен”

Лидерот на Алијанса за Албанците, Зијадин Села, со порака за поддршка на денешниот протест на студентите поврзан со албанскиот јазик, оценувајќи дека борбата за неговата рамноправност мора да продолжи.Во објава на социјалните мрежи, Села вели дека често слуша ставови дека повеќе не треба да се отвора прашањето за албанскиот јазик, но според него тоа е „наметната и опасна теза“.„До кога ќе се занимаваме со албанскиот јазик?“, прашува Села, по што одговара:„До кога јазикот што се зборува на оваа земја повеќе од 8.000 години не биде целосно рамноправен со јазикот што дошол подоцна на оваа територија.“Тој додава дека и кога ќе се постигне целосна еднаквост, борбата нема да запре.„И потоа ќе се занимаваме со него, затоа што е наш, затоа што мислиме, сонуваме и ја градиме иднината на нашиот јазик“, наведува Села.Во пораката, тој посочува дека јазикот е дел од идентитетот и дека неговото губење значи асимилација.„Кога ќе го изгубиш, повеќе не постоиш, асимилиран си“, пишува Села.Тој денешниот датум – 18 мај – го нарекува ден кога „нова генерација ја презема каузата за заштита на албанскиот јазик“, обвинувајќи дека претходно јазикот бил користен за политичка трговија.„Не за да се тргува со него, не за да се менува за власт“, наведува лидерот на Алијанса за Албанците.На крајот, Села повика на поддршка за студентските протести.„Во поддршка на албанскиот јазик, излезете и протестирајте заедно со студентите“, порача тој.

Коментари | пред 2 дена

„Извртени приоритети“ – проблем им е јазикот за правосуден, а не им е квалитетот на образованието, реагира Најчевска

Професорката Мирјана Најчевска со критички став за денешниот протест на студентите кои бараат правосудниот испит да можат да го полагаат на албански јазик, оценувајќи дека фокусот е ставен на погрешно место.Според неа, многу поголем проблем е квалитетот на образованието што го добиваат учениците кои следат настава на албански јазик.„60000 ученици кои следат настава на албански јазик во основните и средните училишта добиваат неквалитетно образование и постигнуваат пониски резултати од учениците кои следат настава на македонски јазик“, напиша Најчевска.Таа додава дека ова, според неа, не е тема што доволно ги засега студентите од албанската етничка заедница.„Ама тоа не е проблем за студентите од албанската етничка заедница во Македонија. Проблем е на кој јазик ќе полагаат правосуден испит 20 души“, наведува професорката.На крајот, Најчевска оценува дека станува збор за погрешно поставени општествени приоритети.„За мене ова се извртени приоритети“, напиша таа.

Коментари | пред 2 дена