Малолетник се заканувал со пиштол по расправија во Оризари

Министерство за внатрешни работи информира дека ОВР Кочани поднела известување против 16-годишник од селото Тркање поради сомнение за сторено кривично дело „загрозување на сигурноста“.Според информациите, на 13 март 2026 година во селото Оризари, по претходна расправија, малолетникот со пиштол му се заканувал на М.Д.(18) од Оризари.Од полицијата соопштија дека против малолетникот е поднесено соодветно известување по документирање на случајот.

Македонија | пред 1 ден

Тешко повреден мотоциклист во сообраќајка кај Јурумлери

Министерство за внатрешни работи информира дека на 18 мај околу 15:40 часот во СВР Скопје била пријавена сообраќајна несреќа во скопското село Јурумлери.Несреќата се случила на крстосницата меѓу регионалниот пат Скопје–Велес и општинскиот пат Јурумлери–Долно Лисиче, помеѓу патничко возило „шкода“ со скопски регистарски ознаки, управувано од М.И.(44) од Скопје и мотоцикл со скопски регистарски ознаки, управуван од М.П.(33) од селото Идризово.Во несреќата тешки телесни повреди добил мотоциклистот, кои биле констатирани во Комплекс клиники „Мајка Тереза“.Увид на местото извршила увидна екипа на СВР Скопје.

Македонија | пред 1 ден

„Какво лицемерие, може цела Влада со бугарски државјани, ама не може малцинства во Уставот“, вели Филипче

Претседателот на СДСМ, Венко Филипче, денеска на прес-конференцијата обвини дека во Владата на Христијан Мицкоски има голем број функционери со бугарски пасоши, оценувајќи дека станува збор за „лицемерие“ во однос на прашањето за внесување на малцинствата во Уставот.На прес-конференција, Филипче рече дека владејачкото мнозинство го одбило предлог-законот на СДСМ со кој премиерот, вицепремиерите, министрите и членовите на Владата не би можеле да имаат двојни државјанства.„Се поставува прашањето зошто тоа го направија? Затоа што пола Влада требаше веднаш да си замине“, изјави Филипче.Тој оцени дека Владата применува двојни стандарди кога станува збор за Бугарите во Уставот и функционерите со бугарски државјанства.„Може целата Влада да биде составена од луѓе кои во џебот имаат бугарски пасоши, ама Бугари во Уставот – тоа не може“, рече лидерот на СДСМ.Филипче во обраќањето повторно се осврна и на Преспански договор, оценувајќи дека претставници на ВМРО-ДПМНЕ признале дека договорот ги заштитил македонскиот идентитет, јазик и култура.Тој посочи и дека членството во НАТО придонело за безбедноста и бизнис-климата, обвинувајќи ја власта дека со години ширела страв и манипулации околу идентитетските прашања.

Македонија | пред 1 ден

Густ чад над Радовиш, жителите реагираат: Предолго сме изложени на токсични материи

Жител на Радовиш преку јавна објава упати апел за поголема заштита на населението поради густите чадови што денови наназад се шират од градската депонија.Во објавата, Герасим Димитров нагласува дека нема потреба од паника, но дека граѓаните мора да бидат заштитени од, како што наведува, долгата изложеност на токсични материи.„Надлежните се на терен, ситуацијата ја држат под контрола и ќе се справат со настаната ситуација. Но, населението мора да биде заштитено“, наведува Димитров.Тој апелира граѓаните да остануваат во климатизирани простории, да носат заштитни маски и да избегнуваат непотребно движење на отворено.Воедно, побара итна проценка на состојбата од Министерство за здравство и Институт за јавно здравје, како и јасни препораки за жителите на Радовиш и околината.Димитров порача и дека стои доброволно на располагање за помош доколку биде потребно справување со состојбата на терен.

Коментари | пред 1 ден

Косовски државјанин возел 203 километри на час кај Смоквица

Министерство за внатрешни работи соопшти дека косовски државјанин бил лишен од слобода откако управувал возило со брзина од 203 километри на час на автопатот А1 кај клучката Смоквица, на делница каде максимално дозволената брзина е 120 километри на час.Според информациите од МВР, на 18 мај околу 22:18 часот, полициски службеници од СВР Струмица – ОВР Гевгелија при сообраќајна контрола со радар го сопреле Б.Т.(30) од Косово.Тој управувал патничко возило „ауди а6“ со косовски регистарски ознаки.Возачот бил исклучен од сообраќај, а за случајот бил известен јавен обвинител од Основното јавно обвинителство во Гевгелија.Против него е поднесена кривична пријава по член 297-а од Кривичниот законик за „безобѕирно управување со моторно возило“.

Македонија | пред 1 ден

„Граѓаните добија уште едно признание – во Владата на Мицкоски врие од бугарски пасоши“, вели Филипче

Претседателот на СДСМ, Венко Филипче, на денешната прес-конференција упати серија обвинувања кон ВМРО-ДПМНЕ и премиерот Христијан Мицкоски, тврдејќи дека во Владата има голем број функционери со бугарски пасоши.Филипче рече дека владејачкото мнозинство го одбило предлог-законот на СДСМ со кој премиерот, вицепремиерите, министрите и членовите на Владата не би можеле да имаат двојни државјанства.„Се поставува прашањето зошто тоа го направија? Затоа што пола влада требаше веднаш да си замине“, изјави Филипче.Тој оцени дека власта покажува лицемерие, бидејќи, според него, дел од функционерите поседуваат бугарски државјанства, а истовремено се противат на внесување на Бугарите и другите малцинства во Уставот.Во своето обраќање, Филипче повторно го спомена Преспански договор, наведувајќи дека претставници на ВМРО-ДПМНЕ веќе признале дека договорот ги заштитил македонскиот идентитет, јазик и култура.Тој посочи и дека членството во НАТО придонело за безбедноста и бизнис-климата во државата, обвинувајќи ја ВМРО-ДПМНЕ дека порано се спротивставувала на евроатлантските интеграции.Филипче порача дека внесувањето на Бугарите и другите малцинства во Уставот треба да се случи што поскоро, оценувајќи дека тоа ќе придонесе за продолжување на европскиот пат на државата.„Реформи сега и Европа сега“, порача лидерот на СДСМ.

Македонија | пред 1 ден

СДСМ: ВМРО-ДПМНЕ слави туѓи победи и води лицемерна политика

Од СДСМ денеска преку соопштение упатија остри критики кон ВМРО-ДПМНЕ, обвинувајќи ја владејачката партија за, како што велат, лицемерна политика и двојни стандарди во однос на европските и евроатлантските интеграции.Во реакцијата, СДСМ наведува дека ВМРО-ДПМНЕ го слави Денот на Европа, иако, според нив, води антиевропска кампања и работи против европските вредности.„Работат за руски интереси, а слават ЕУ која воведе санкции против Русија“, стои во реакцијата.Од партијата посочуваат и дека ВМРО-ДПМНЕ порано се противела на Преспански договор и влезот на Македонија во НАТО, а денес, како што наведуваат, ја претставува Алијансата како позитивен процес.СДСМ оценува дека постојат „две ВМРО“ – едно што се претставува како проевропско пред меѓународната заедница и друго што, според нив, води антиевропска политика дома.Во соопштението се споменуваат и обвинувања за функционери со бугарски пасоши, како и наводни врски со руски интереси.На крајот од реакцијата, СДСМ се осврнува и на ангажманот на музичарот Дејвид Гета, наведувајќи дека проблемот не е во изведувачот, туку во, како што тврдат, „сметките што ќе ги плаќаат граѓаните“ и можните провизии поврзани со организацијата.

Македонија | пред 1 ден

Ќе се реконструираат детски игралишта и урбана опрема во Карпош

Општина Карпош започна пролетна акција за реконструкција и реновирање на детските игралишта и урбаната опрема на својата територија.Во рамки на акцијата ќе се врши обнова на детските игралишта, реконструкција и замена на оштетените клупи и корпи за ситен отпад, како и уредување на останатата урбана опрема што е во надлежност на општината.Од локалната самоуправа информираат дека, според предвидената динамика, во наредниот период сите игралишта и урбани содржини ќе добијат подобар изглед и ќе бидат побезбедни за користење.„Игралиштата ќе бидат безбедно место за игра на најмалите жители, како и простор за релаксација на сите карпошани“, соопштија од Општината.Заменик-градоначалникот Неделчо Крстевски секојдневно ја следи работата на екипите кои работат на терен низ општината.Од Општина Карпош велат дека активностите се дел од заложбите за обезбедување побезбедна и поуредена средина за граѓаните.

Скопје | пред 1 ден

Радовиш под чад од депонијата што гори пет дена

Густ чад утринава го прекри Радовиш поради пожарот на градската депонија, која гори веќе петти ден, по што локалните власти најавија итни мерки и препораки за граѓаните.На терен е ангажирана целокупната расположлива механизација, вклучително и камиони кипери, багери и булдожери, со цел депонијата да биде покриена со земја. Според надлежните институции, тоа е единствениот начин за задушување на чадот.Иако во моментов нема отворен пламен, депонијата и понатаму испушта густ чад, кој се спушти над градот.Главната препорака до граѓаните е да не излегуваат надвор доколку немаат итна потреба.Од Кризниот штаб најавија дека наскоро ќе бидат соопштени дополнителни мерки и препораки за заштита на населението.

Македонија | пред 1 ден

Албанскиот амбасадор, Мејдани: Студентите бараат достоинство, а не привилегии

Амбасадорот на Албанија во Македонија, Денион Мејдани, реагираше преку социјалните мрежи по информациите дека албански студенти биле задржувани, доцнеле и биле заплашувани додека патувале кон Македонија за да дадат поддршка на правото за полагање на правосудниот испит на албански јазик.Во својата објава, Мејдани оценува дека кога студентите се спречуваат мирно да изразат солидарност за едно јазично право, прашањето престанува да биде само процедурално и станува тема што го засега демократскиот дух и европските вредности на регионот.Тој посочува дека студентите од Тирана не патувале за конфликти, туку за граѓанска солидарност и поддршка на, како што наведува, елементарно право – можноста да се полага и да се работи професијата на мајчин јазик.„Овие млади луѓе не бараат привилегии. Бараат достоинство, еднаквост и почитување на основните права“, наведува Мејдани.Во реакцијата тој додава дека барањето за достоинство не смее да се доживува како закана, особено во држави кои имаат европски амбиции и сакаат иднината да ја градат врз принципите на демократијата, еднаквоста и човековите права.

Македонија | пред 1 ден

Возел мотор во спротивен правец во Грција, кога го фатиле откриле дека има 8 судски пресуди

Полицијата во понеделник уапси 63-годишен маж поради возење во спротивен правец на улица во Солун, во северна Грција.Осомничениот, египетски државјанин, управувал трицикличен мотор во областа Тумба кога бил запрен.Полицајците утврдиле дека тој нема возачка дозвола и дека има осум нерешени пресуди за прекршување на здравствени прописи, со вкупна затворска казна од 54 месеци.Полицијата исто така пронашла и конфискувала нож.

Свет | пред 1 ден

Силјановска-Давкова: Уставните измени не смеат да бидат резултат на притисоци

Претседателката Гордана Силјановска-Давкова оцени дека европскиот пат на Македонија не смее да биде условуван со идентитетски прашања и билатерални барања, нагласувајќи дека државата не е против уставни измени, но тие треба да произлегуваат од европските критериуми, а не од политички притисоци.На предавање на Правниот факултет во Љубљана, на тема „Уставни трансформации на патот кон ЕУ: Реформи или уставен инженеринг?“, таа посочи дека дел од досегашните измени на македонскиот Устав, меѓу кои и оние произлезени од Охридскиот рамковен договор и Преспанскиот договор, биле донесени под силно меѓународно влијание.Според неа, по Преспанскиот договор постоеле уверувања дека тоа ќе биде последната отстапка на патот кон Европската Унија, но денес повторно се отвора прашањето за уставни измени, овојпат со барањето за внесување на Бугарите во Уставот.Силјановска-Давкова предложи можен компромис, според кој уставните измени би биле усвоени, но нивното стапување во сила би се одложило до завршувањето на преговорите со ЕУ.„Македонија не се плаши од вето, но условувањата треба да се темелат на европските критериуми, а не на прашања поврзани со историјата, јазикот и идентитетот“, истакна претседателката.Таа посочи дека македонскиот Устав и сега гарантира еднакви права за сите граѓани, вклучително и за заедниците што не се експлицитно наведени во него.Во обраќањето, Силјановска-Давкова ја критикуваше и Бугарија, наведувајќи дека таму нема посебни уставни гаранции за малцинствата и дека не се почитуваат сите пресуди на Европскиот суд за човекови права поврзани со правата на Македонците.Според неа, процесот на пристапување кон Европската Унија не смее да биде билатерализиран, особено кога станува збор за идентитетски теми.

Македонија | пред 1 ден

ЕУ: „Нулта толеранција“ за нелегален риболов во Егејското Море

Брисел ја повтори потребата да се почитуваат суверените права на земјите-членки на ЕУ и изрази „нулта толеранција“ кон нелегалниот риболов, коментирајќи го барањето на Грција да интервенира и да ги запре прекршувањата на поморското право од страна на турски рибари во Егејското Море.„Дискусијата за поморскиот простор е директно поврзана со меѓународното право и со стратешкиот интерес на ЕУ за стабилен и безбеден Медитеран, каде што суверените права на земјите-членки се целосно почитувани. Ова се однесува и на инциденти на нелегален, прикриен и нерегулиран риболов,“ изјави портпаролот на Европската комисија, Мачиеј Берестецки, за „Катимерини“.„Позицијата на Комисијата, како што е одразено во неодамнешниот Пакт за Медитеранот, е јасна: нулта толеранција кон нелегален, прикриен и нерегулиран риболов и цврсто почитување на суверените права на земјите-членки,“ додаде тој.Грчкиот министер за морнарица Василис Кикилиас го покрена ова прашање на состанок со европскиот комесар за рибарство и океани, Костас Кадис, минатиот петок во Атина.„Го истакнав пред комесарот, голем проблем за Грција во однос на нашите рибари и риболовот, како и провокативното однесување на нашите турски соседи во врска со незаконскиот риболов, непочитувањето на законот за морето и оспорувањето на нашите суверени права,“ рече Кикилиас. „Бараме Европската унија да интервенира,“ додаде тој, истакнувајќи дека грчките морски граници се и европски граници.Берестецки рече дека, иако патролирањето во националните води е главно одговорност на националните власти, ЕУ ги поддржува овие напори преку алатки за надзор, финансирање од Европскиот фонд за морско, рибарство и аквакултура, координација од Европската агенција за контрола на рибарството и регионални организации како Општата комисија за рибарство на Медитеранот.

Свет | пред 1 ден

Двајца возачи без дозвола приведени во Прилеп

Полициски службеници од ОВР Прилеп вчера лишиле од слобода две лица кои управувале возила без возачка дозвола.Како што информира СВР Битола, на патниот правец Прилеп – Градско во 17:20 часот бил запрен патнички автомобил „рено“ со тетовски регистарски ознаки, управуван од С.И.(44) од селото Желино.При контролата било утврдено дека возачот управувал без возачка дозвола, по што бил лишен од слобода.Претходно, во 12:30 часот на улицата „Велко Јанкулоски Стариот“ во Прилеп, полициски службеници го привеле и К.Ф.(40) од Прилеп.Тој управувал патничко возило „хјундаи“ со прилепски регистарски ознаки, а при контролата било констатирано дека не поседува возачка дозвола.По документирање на случаите, против двајцата ќе следуваат соодветни поднесоци.

Македонија | пред 1 ден

Граната од Првата светска војна пронајдена во битолско село

Во СВР Битола вчера било пријавено дека во нива во селото Логоварди била пронајдена граната.Од полицијата информираат дека по пријавата интервенирал пиротехничар од Дирекција за заштита и спасување – Битола, кој безбедно ја подигнал експлозивната направа.Според информациите, станува збор за артилериска граната која потекнува од Прва светска војна.

Македонија | пред 1 ден

По Трамп и Путин, и Вучиќ во посета на Пекинг – тоа го потврдува силниот однос меѓу Србија и Кина

Претседателот на Српска напредна странка и советник на српскиот претседател, Милош Вучевиќ, ја оцени претстојната посета на Александар Вучиќ на Кина како исклучително важна за зајакнување на дипломатските и економските односи меѓу двете земји.Според Вучевиќ, фактот што Вучиќ патува во Пекинг веднаш по светски лидери како Доналд Трамп и Владимир Путин покажува висок степен на почитување и блиски односи меѓу српското и кинеското раководство.Тој најави дека од посетата се очекуваат нови инвестиции, економски проекти и договори поврзани со енергетиката.Меѓу темите што ќе бидат отворени, според Вучевиќ, е и соработката со Азербејџан за изградба на гасна електрана во Ниш.Покрај економските прашања, тој најави и средби со високи претставници на Комунистичката партија на Кина.Во своето обраќање, Вучевиќ се осврна и на внатрешно-политичките теми во Србија, критикувајќи ги најавените „студентски листи“, за кои рече дека зад нив не стојат вистински студенти, туку структури кои создаваат хаос и работат против интересите на државата.Тој порача дека СНС ќе понуди листа со млади луѓе и студенти кои, според него, навистина ќе ги застапуваат интересите на младите.Посебен акцент Вучевиќ стави и на претстојните избори во Косово и Метохија, закажани за 7 јуни, при што ги повика Србите масовно да гласаат за Српска листа.Воедно, тој упати критики и кон политичари кои, според него, со своите ставови му помагаат на косовскиот премиер Албин Курти.На крајот, Вучевиќ порача дека државата треба решително да се справи со, како што рече, деструктивните и криминални структури.

Свет | пред 1 ден

Мицкоски од Разловци повика на обединување околу државните интереси

Премиерот Христијан Мицкоски денеска се обрати на одбележувањето на 150-годишнината од Разловечко востание во селото Разловци, при што упати пораки за зачувување на државата, национално единство и заштита на идентитетот.Во говорот, Мицкоски истакна дека Разловечкото востание не претставувало само оружен отпор, туку и почеток на народното будење и револуционерната борба што подоцна водела кон Илинден.„Денес татковината не ја браниме со пушка во рака. Денес ја браниме со мудрост, со работа, со економски развој, со силни институции, со образование, со национално единство и со достоинствено водење на државата“, рече премиерот.Тој нагласи дека народот премногу страдал за лесно да се тргува со честа, идентитетот и историјата, упатувајќи и порака за внимателност кон, како што рече, политичари кои носат одлуки зад затворени врати.„Ниту една политичка разлика не смее да биде поголема од татковината. Ниту една лична амбиција не смее да биде поважна од иднината на нашите деца“, порача Мицкоски.На настанот се обрати и министерот за култура Зоран Љутков, кој истакна дека без малите востанија немало да постојат големите победи.Тој информираше дека за реконструкција на Спомен-домот на Разловечкото востание биле инвестирани околу 20 милиони денари.Градоначалникот на Делчево, Иван Гоцевски, најави иницијатива селото Разловци да биде прогласено за заштитена историска целина, а 19 мај да стане неработен ден.Чествувањето заврши со полагање свежо цвеќе од бројни делегации пред реконструираниот Спомен-дом.

Македонија | пред 1 ден

„Семејните и личните интереси на обвинителите Коларевиќ и Абази, ги амнестираше осомничените блиски до СДС и ДУИ за случајот „Мазут“ вреден 167 милиони евра“, вели Лефков

Пратеникот на ВМРО-ДПМНЕ, Миле Лефков, денеска на прес-конференцијата повторно упати обвинувања кон обвинителите Катерина Коларевиќ и Ислам Абази, тврдејќи дека со прекинувањето на постапката за случајот „Мазут“ биле заштитени лица блиски до СДСМ и ДУИ.Според Лефков, случајот, кој според него е вреден 167 милиони евра, не завршил во судница, туку бил запрен уште во обвинителството.„Не беа доволни извештаите на ДЗР, не беа доволни докази од МВР, не беше доволно тоа што се труеше народот“, изјави Лефков.Тој во обраќањето се осврна и на, како што рече, семејните и политичките врски на обвинителите.За Катерина Коларевиќ посочи дека нејзините родители биле избрани на државни функции од влади предводени од СДСМ, додека за Абази рече дека има блиски релации со лидерот на ДУИ, Али Ахмети.„Оваа коалиција на Коларевиќ и Абази од обвинителството, ја спаси коалицијата на СДС и ДУИ во политиката“, рече Лефков.Тој постави и прашања дали зад прекинот на постапката стојат финансиски мотиви и зошто, според него, Советот на јавни обвинители не реагирал.Во изјавата Лефков го спомена и поранешниот директор на ЕСМ, Васко Ковачевски, прашувајќи зошто СДСМ не побарал негово враќање во Македонија.„Правда мора да има. Обвинителството не смее да биде засолниште за кадрите на СДС и ДУИ“, порача Лефков.

Македонија | пред 1 ден

Манасиевски: Филипче и натаму не го осудува говорот на бугарската министерка која не нарече “северномакедонци”, напротив соработува со нашите негатори

Портпаролот на ВМРО-ДПМНЕ, Валентин Манасиевски, денеска на прес-конференцијата упати нови критики кон лидерот на СДСМ, Венко Филипче, обвинувајќи го дека не реагирал на изјавите на бугарската министерка Петрова Чамова.Според Манасиевски, Филипче речиси две недели не го осудил, како што рече, „недостоинствениот говор“ во кој Македонија и Македонците биле наречени „северномакедонци“.„Филипче и натаму не го осудува говорот на бугарската министерка која не нарече ‘северномакедонци’, напротив соработува со нашите негатори“, изјави Манасиевски.Тој посочи дека Филипче не се оградил ниту од изјавите на Рубин Земон, член на Извршниот одбор на СДСМ, кој, според Манасиевски, изнел ставови за Гоце Делчев.Од ВМРО-ДПМНЕ оценуваат дека ваквите политики ѝ даваат простор на Бугарија да поставува нови барања кон Македонија.Манасиевски во обраќањето повтори и обвинувања дека Филипче, како што рече, останува „лојален кон Бугарија“, додавајќи дека причините за тоа се поврзани со неговото политичко минато и соработката со Зоран Заев.„Македонија има своја историја, култура, идентитет и јазик, а ВМРО-ДПМНЕ нема да дозволи преговарање за овие теми“, порача Манасиевски.

Македонија | пред 1 ден

Жерновски со критики до власта по собирот за поддршка на Вучиќ во Куманово

Поранешниот функционер Андреј Жерновски преку објава на социјалните мрежи упати остри критики кон премиерот Христијан Мицкоски, министерот Тимчо Муцунски и владејачката коалиција, обвинувајќи ги за двојни стандарди по политичкиот собир за поддршка на српскиот претседател Александар Вучиќ во Куманово.Во објавата, Жерновски наведува дека доколку во Македонија бил организиран митинг за поддршка на бугарскиот претседател Румен Радев, власта, според него, ќе реагирала со обвинувања за мешање во внатрешните работи и загрозување на суверенитетот.„Ама кога во Куманово јавно се организира политички собир за поддршка на братот Вучиќ – тогаш молк“, напиша Жерновски.Тој оценува дека молчењето на власта е доказ за, како што наведува, дволична политика и селективен пристап кон прашањата за странско политичко влијание.Во својата реакција, Жерновски го отвора и прашањето за односот на власта кон различните етнички заедници во државата.„Ако 3.504 Бугари во нашата држава одеднаш се претставуваат како огромен ризик за државата и народот, тогаш како е можно 35.939 Срби во Македонија да не се никаква закана за македонскиот идентитет, јазик, култура?“, наведува тој.Според Жерновски, власта селективно шири страв и манипулации со цел, како што тврди, да ја оправда блокадата на европскиот пат на државата.„Кога им одговара – туѓ политички митинг е ‘братска поддршка’. Кога не им одговара – истото тоа е ‘национална катастрофа’“, напиша Жерновски.

Македонија | пред 1 ден

Ѓорѓиевски: Младите мора да бидат двигатели на промените во регионот

Градоначалникот на Скопје, Орце Ѓорѓиевски, денеска беше говорник на 11. Форум на Стратегијата на Европската Унија за Јадранско-јонскиот регион – ЕУСАИР, што се одржува во главниот град.Ѓорѓиевски оцени дека форумот претставува важен простор за дијалог, размена на искуства и креирање заеднички решенија од значење за граѓаните од регионот.„Во време на брзи промени, геополитички предизвици, економски притисоци и демографски трансформации, регионалната соработка не е избор, туку неопходност“, порача Ѓорѓиевски.Тој нагласи дека само преку координирани и одговорни политики може да се постигне посилен економски развој, подобра инфраструктурна и институционална поврзаност и поголема општествена кохезија во регионот.Според него, годинешниот форум е насочен кон спроведување на ревидираниот Акциски план на ЕУСАИР и зајакнување на соработката во контекст на проширувањето на Европската Унија.Ѓорѓиевски посебно се осврна и на младите, оценувајќи дека тие треба да бидат активни учесници и носители на нови идеи и промени.„Демографските предизвици бараат сериозни политики што ќе создаваат можности, ќе ги задржат младите во регионот и ќе им дадат причина својата иднина да ја градат токму тука“, истакна тој.Во своето обраќање, градоначалникот потенцираше дека прекуграничната соработка е еден од најсилните механизми за поврзување на општествата, институциите и економиите во регионот.„Од Скопје денес испраќаме силна порака – кога работиме заедно, кога градиме доверба и кога имаме заедничка визија, можеме многу повеќе“, порача Ѓорѓиевски.

Скопје | пред 1 ден

„Криминалната ВМРО удри и по студентите, се намалуваат стипендиите, поскапува сместувањето во студентските домови“, вели Кузмановска

На прес-конференција, Стефанија Кузмановска oд Социјалдемократска младина на Македонија денеска остро ги критикуваа измените на Законот за студентски стандард, оценувајќи дека новите решенија претставуваат директен удар врз студентите и нивниот животен стандард.На прес-конференција, Стефанија Кузмановска од СДММ обвини дека власта наместо да го подобрува студентскиот стандард, ја намалува поддршката за младите.„Се намалуваат стипендиите за социјални категории, поскапува сместувањето во студентските домови“, рече Кузмановска.Таа посочи дека со новите законски измени се воведува категоризација на студентските домови во два типа – реконструирани и енергетски ефикасни домови, како и постојни нереновирани домови.Според СДММ, ваквиот модел ќе создаде нееднакви услови за студентите.„Наместо еднакви услови за сите, ВМРО создава двокласен систем во високото образование“, изјави Кузмановска.Од организацијата реагираат и на намалувањето на државната поддршка за сместување и исхрана во реновираните домови, каде државата наместо досегашните 50 проценти ќе покрива до 40 проценти од трошоците.Дополнително, СДММ ја критикува и одлуката за укинување на мерката воведена за време на ковид-кризата, со која студентите што нема да добијат место во студентски дом добиваа поддршка до 6.000 денари за приватно сместување или меѓуградски превоз.Од младинската организација реагираат и на намалувањето на квотата за стипендии за социјално ранливи категории студенти, која според измените ќе изнесува 40 проценти наместо досегашните 49 проценти.„Со оваа власт младите ќе си заминуваат од државата уште порано, барајќи подобри услови, поголема сигурност и поправеден систем“, порача Кузмановска.Од СДММ побараа итно повлекување на законските измени, оценувајќи дека тие дополнително ги осиромашуваат и понижуваат студентите.

Македонија | пред 1 ден

Гостиварец приведен откако возел без возачка дозвола, возилото е одземено

Полициски службеници од СВР Тетово синоќа лишиле од слобода 32-годишен жител на Долна Бањица, гостиварско, откако бил затекнат како управува возило без возачка дозвола.Како што информира полицијата, на улицата „Беличица“ во Гостивар било запрено патничко возило „сеат ибица“ со тетовски регистарски ознаки, управувано од А.С.(32).При контролата било утврдено дека возачот управувал со возилото во јавен сообраќај без да поседува возачка дозвола.Возилото било одземено, а по целосно документирање на случајот против него ќе биде поднесена соодветна пријава.

Македонија | пред 1 ден

Малолетник нападнат со метален предмет од тројца соученици во Тетово

Во СВР Тетово синоќа бил пријавен случај на физички напад врз малолетник во Тетово.Според информациите од полицијата, 49-годишниот З.Б. од Тетово пријавил дека неговиот малолетен син околу 09 часот бил физички нападнат на крстосницата меѓу улиците „Борис Кидрич“ и „Јане Сандански“.Како што е наведено во пријавата, нападот го извршиле тројца негови соученици, при што употребиле и метален предмет.Од полицијата информираат дека се работи на документирање на случајот во координација со родителите и претставници од Центарот за социјални работи.

Македонија | пред 1 ден

Продал „нисан микра“, добил само дел од парите

Во СВР Тетово вчера бил пријавен случај на измама поврзан со продажба на автомобил.Според информациите од полицијата, 36-годишен жител на тетовско село пријавил дека бил измамен од 37-годишниот А.Л. од селото Палчиште.Како што е наведено во пријавата, пред околу шест месеци сопственикот му дал полномошно на А.Л. за користење и управување со неговото патничко возило „нисан микра“ со тетовски регистарски ознаки.Договорот бил возилото да биде продадено за 4.500 евра, а исплатата да се врши на месечни рати од по 1.000 евра.Според пријавеното, А.Л. исплатил само 1.000 евра, по што престанал да го подмирува преостанатиот долг од 3.500 евра.Дополнително, без знаење и согласност на сопственикот, возилото било препродадено на трето лице за сума од 3.200 евра.Од полицијата информираат дека се преземаат мерки за расчистување на случајот.

Македонија | пред 1 ден