Барселона плати десетпати повеќе за играч вреден 800.000 евра: Кој е Џеси Бисиву?

Барселона официјално го потврди ангажманот на 18-годишниот белгиски фудбалер Џеси Бисиву, кој пристигнува од Клуб Бриж во трансфер вреден 8,5 милиони евра. Белгискиот клуб ќе задржи и 20 проценти од сумата од евентуалниот негов иден трансфер.

— реклама —

Иако неговата моментална пазарна вредност според „Трансфермаркт“ се проценува на околу 800.000 евра, каталонскиот гигант реши да плати повеќе од десетпати поголема сума за младото крило.

— реклама —

Бисиву досега нема настап во белгиската прва лига, но минатата сезона беше стандарден првотимец на вториот тим на Клуб Бриж, за кој одигра 36 натпревари, постигна два гола и запиша две асистенции. Во младинската Лига на шампиони настапи на 14 натпревари, со учинок од три гола и една асистенција.

— реклама —

Според Барт Тамсин, раководител на „Трансфермаркт“ за Белгија и поранешен скаут на Клуб Бриж, Бисиву важи за еден од најголемите белгиски таленти. Тој го спореди со белгискиот репрезентативец Жереми Доку, истакнувајќи дека се работи за брзо и технички потковано лево крило кое е силно во играта „еден на еден“, но сè уште треба да напредува во тимската игра и дефанзивните задачи.

Младиот Белгиец со потекло од Гана досега настапуваше за сите младински селекции на Белгија, а годинава дебитираше и за репрезентацијата до 19 години.