(Видео) Хаос во Барселона: 100 уапсени, десетици пожари и ограбени продавници

Сто лица се уапсени по насилните протести што во саботата вечерта избувнаа во центарот на Барселона, при што беа демолирани и ограбени продавници, подметнати десетици пожари и предизвикана значителна материјална штета. Околу една четвртина од уапсените се малолетници, јавува Ројтерс.

Нередите се случиле во околината на плоштадот Каталонија, еден од најпрометните делови на градот, кој секојдневно го посетуваат голем број туристи и жители.

— реклама —

Според каталонската министерка за внатрешни работи, Нурија Парлон, околу 25 проценти од приведените лица се помлади од 18 години.

За време на протестите биле подметнати повеќе од 30 пожари, додека 14 продавници биле оштетени или ограбени. Демонстранти со качулки, претежно облечени во црно, кршеле излози и изнесувале стока од продажните објекти.

— реклама —

На социјалните мрежи се појавија снимки на кои се гледаат насилните сцени од центарот на Барселона. Во одредени продавници, меѓу кои и познатата стоковна куќа „Ел Корте Инглес“, купувачите останале затворени внатре откако вработените ги спуштиле заштитните ролетни за да спречат упад и грабеж.

— реклама —

Повиците за собирање претходно се ширеле преку социјалните мрежи, со пораки за поддршка на движење против системот. Во дел од објавите се користел слоганот „Institut Indignats“, односно „Огорчени средношколци“, инспириран од слично протестно движење меѓу учениците во Франција.

Според објавените информации, дел од учесниците во нередите добивале поддршка и од лица кои ги следеле нивните постапки преку интернет.

Градоначалникот на Барселона, Жауме Колбони, остро го осуди насилството и порача дека уништувањето на јавниот и приватниот имот нема да остане неказнето.

Тој предупреди дека правни последици би можеле да сносат и родителите или старателите на малолетниците кои учествувале во нередите.