Каталонската полиција го идентификувала мажот кој минатата среда беше убиен со истрел во тилот пред полициска станица на Националната полиција во Барселона, а станува збор за српски државјанин по кого била распишана европска потерница од белгиските власти.
Според шпанските медиуми, жртвата починала на самото место, пред очите на случајни минувачи и граѓани кои чекале пред полициската станица за административни постапки и издавање документи.
Истрагата покажала дека убиениот се движел низ Европа користејќи повеќе различни идентитети, што ја отежнало неговата идентификација. Поради тоа, истражителите побарале помош од базата на Интерпол, доставувајќи ги отпечатоците од неговите прсти.
Одделот за убиства при каталонската полиција продолжува да трага по напаѓачот, кој, според досегашните сознанија, дејствувал без да го прикрие лицето, иако бил снимен од безбедносните камери во околината. Дополнително, само неколку метри од местото на злосторството, под седиште на автобуска постојка, биле пронајдени автоматски пиштол, велосипедска кацига и мобилен телефон.
Убиството, кое се случило на улицата „Балмес“, е шесто убиство извршено со огнено оружје во Каталонија од почетокот на годината. Злосторството било извршено во време кога во Барселона престојувал папата Лав XIV и кога биле спроведени едни од најголемите безбедносни мерки во градот во последните години. И покрај тоа, напаѓачот успеал да избега.
Дваесет и четири часа по последното убиство, раководството на каталонската полиција призна дека зачестените вооружени пресметки предизвикуваат сериозна загриженост и најави зајакнување на истражните тимови што работат на случаи поврзани со организираниот криминал.
Поради тековната истрага, надлежните засега не откриваат повеќе детали, но началникот на полициската управа, Тони Родригез, потврдил дека сите шест убиства извршени со огнено оружје годинава се поврзани со организиран криминал, а заеднички именител во нив е трговијата со дрога.
