Најмалку 137 лица се повредени во пожар што избувнал во метрото во Барселона, поради што биле евакуирани две метро станици.
Според Службата за итна медицинска помош (SEM), 131 лице се здобило со полесни повреди, додека шестмина биле згрижени поради посериозни здравствени проблеми, главно предизвикани од вдишување чад и напади на паника.
Вкупно 39 повредени биле пренесени во болници и здравствени установи, а на местото на настанот интервенирале 24 екипи на итната медицинска помош.
Инцидентот се случил непосредно пред 18 часот, кога железничкиот сообраќај меѓу станиците „Глорис“ и „Клот“ бил прекинат поради густ чад во тунелот.
Возот останал заглавен во тунелот, по што дел од патниците насилно ги отвориле вратите и пеш се евакуирале низ тунелот во двата правци, каде што биле пречекани од спасувачките служби.
На терен интервенирале припадници на каталонската полиција, локалната полиција на Барселона и пожарникарите, кои успеале да го локализираат и изгаснат пожарот нешто по 19:30 часот.
Според генералниот директор на компанијата „Транспорт Метрополитанс де Барселона“ (TMB), Шавиер Флорес, пожарот избувнал откако се урнал дел од облогата во тунелот, што предизвикало запалување на надземниот електричен вод.
Ова е втор сериозен инцидент во метрото во Барселона за помалку од една недела. Минатата среда, експлозија предизвикана од истекување на гас на градилиште кај станицата „Пласа де Сантс“ повреди осум лица, од кои двајца се здобија со тешки повреди.
