Белгиската федерална влада започнува преговори со енергетската компанија Енџи за можно преземање на нуклеарните електрани во земјата, се наведува во заедничко соопштение. До постигнување конечен договор се суспендираат сите активности за демонтажа на нуклеарните постројки, со што, како што е наведено, се оставаат отворени сите опции за идниот енергетски систем на државата, пренесува VRT.
Белгија моментално располага со седум нуклеарни реактори – четири во Доел и три во Тиханж, од кои само Доел 4 и Тиханж 3 сè уште се активни, со продолжен работен век до 2035 година. Владата разгледува дополнително продолжување на нивната работа, додека останатите реактори беа затворени во периодот од 2022 до 2025 година.
Во соопштението се наведува дека засега станува збор за писмо за намери, но целта е до 1 октомври да се финализира договор кој би опфатил преземање на реакторите, персоналот, имотот и обврските поврзани со декомисија и затворање на постројките. Финансиските детали засега не се објавени.
Премиерот Барт де Вевер оцени дека со овој потег Белгија се насочува кон „безбедна, пристапна и одржлива енергија“, со намалување на зависноста од увоз на фосилни горива и поголема контрола врз снабдувањето со енергија.
