Србија упати остар протест до Европската Унија поради оценката дека се исполнети условите за отворање на главниот мост на Ибар во Косовска Митровица. Белград смета дека таквата позиција не ја одразува реалната состојба на теренот и дека пред отворањето мора да бидат исполнети претходно договорените обврски.
Директорот на Канцеларијата за Косово и Метохија, Петар Петковиќ, во протестното писмо до специјалниот претставник на ЕУ за дијалогот меѓу Белград и Приштина, Петер Соренсен, наведува дека Србија со голема загриженост ја примила изјавата на портпаролот на ЕУ за можноста за отворање на мостот.
Станува збор за мостот на Ибар, кој го поврзува, односно раздвојува северниот дел на Косовска Митровица, каде што претежно живее српско население, од јужниот дел, населен претежно со Албанци.
Петковиќ во писмото посочува дека не се исполнети сите услови претходно договорени во рамки на дијалогот меѓу Белград и Приштина. Како пример го наведува нерешеното прашање околу разграничувањето на северниот и јужниот дел на Митровица во катастарската зона „Суви Дол“.
Според него, ова прашање е директно поврзано со договорите постигнати во рамки на дијалогот за главниот мост на Ибар. Тој потсетува и дека со договорот од 25 август 2015 година, прашањата за слободата на движење, инфраструктурните работи и отворањето на мостот биле разгледувани заедно со безбедносните прашања, што се од особено значење за српското население во областа на мостот, Суви Дол и други чувствителни подрачја.
„Актуелната безбедносна состојба, особено на северот на Косово и Метохија, укажува дека отворањето на мостот во овој момент не би било безбедно и дополнително би го зголемило чувството на несигурност кај српското население“, истакнал Петковиќ.
Тој потсетил дека просторот околу главниот мост на Ибар со децении е едно од најчувствителните безбедносни подрачја поради бројните напади врз Срби во Косовска Митровица и во други делови на Косово и Метохија.
Дополнителна загриженост, според Белград, предизвикуваат и наводите за инволвираност на припадници на косовската полиција во етнички мотивирани напади. Петковиќ посочил дека биле регистрирани случаи во кои се укажува на, како што наведува, брутално постапување и прикривање на напади врз Срби.
Во протестното писмо се нагласува и улогата на ЕУ како посредник во дијалогот и гарант на спроведувањето на постигнатите договори. Според Петковиќ, Унијата има одговорност да го зачува неутралниот пристап и да обезбеди услови отворените прашања да се решаваат преку договор меѓу двете страни.
Белград смета дека одлука за отворање на мостот може да се донесе дури откако целосно ќе бидат исполнети претходно преземените обврски во рамки на дијалогот и ќе биде направена убедлива и одржлива безбедносна проценка.
Таквата проценка, според Србија, треба да гарантира дека отворањето нема да ја загрози безбедноста на српското население, да ги зголеми постојните тензии или да предизвика нова криза на северот на Косово и Метохија.
