Англискиот репрезентативец Џуд Белингам првпат јавно се огласи по поразот од Аргентина во полуфиналето на Светското првенство, со што Англија остана без можност да се бори за титулата.
Играчот од средниот ред на Реал Мадрид на социјалните мрежи објави емотивна порака, истакнувајќи дека тешко пронашол зборови со кои би ги опишал чувствата по елиминацијата.
„Ми беше тешко да ги најдам вистинските зборови за тоа што го доживеавме против Аргентина и во изминатите неколку недели, но оваа песна најдобро ја доловува суштината“, напиша Белингам.
Тој им се заблагодари на навивачите за поддршката што ѝ ја даваа на англиската репрезентација за време на турнирот.
„Ви благодарам на сите за неверојатната поддршка. Да не дозволиме единството и љубовта што ги видовме на ова Светско првенство да исчезнат. Кога сме обединети, можеме да постигнеме големи работи. И ќе ги постигнеме. Ве сакам“, порача Белингам.
Фудбалерот беше во центарот на вниманието и поради вербалниот дуел со Лионел Меси во текот на натпреварот. По средбата тој објасни дека станувало збор за расправија околу еден прекршок.
„Се расправавме околу еден прекршок. Немаше ништо сериозно. Сигурен сум дека многумина ќе направат голема приказна од тоа, но навистина не беше ништо посебно. Му реков дека е доволно силен за да го издржи тој дуел“, изјави Белингам.
На крајот призна дека поразот многу го боли, но истакна дека било привилегија да игра против еден од најдобрите фудбалери во историјата.
„Секако дека боли кога ќе загубите, но привилегија е да играте против еден од најголемите во историјата“, порача англискиот репрезентативец.
