„Без вас можеме“: Судијката ги отстрани родителите од рочиштето за „Пулс“, тие ѝ возвратија дека не можат без своите деца

Тензично е денешното рочиште за случајот „Пулс“, откако родителите на загинатите деца реагирале на прашањата на одбраната и на сведочењето на техничкиот советник ангажиран од одбраната.

Судијката Дијана Груевска Илиевска, по гласните дофрлања од родителите, им рекла: „Без вас во судницава можеме, а без обвинетите и адвокатите не можеме да ја водиме постапката“. Родителите ѝ возвратиле дека и тие не можат без своите деца, по што, на барање на судијката, ја напуштиле судницата за да се смират.

— реклама —

Револтот настанал во текот на прашањата на адвокатката Ивана Коцевска и одговорите на техничкиот советник Петре Русески. Тој објаснувал дека објектот во кој функционирала дискотеката „Пулс“ бил наменет како деловно-производствен објект. Родителите реагирале, нарекувајќи го местото каде што загинале нивните деца „гасна комора“.

Напнатост предизвикала и употребата на зборот „јавност“ од страна на адвокатката, на што родителите реагирале дека тие не се јавност, туку оштетени.

— реклама —

По родителите, од судницата излегол и првообвинетиот Дејан Јованов-Деко, кој се пожалил дека не му е добро. Држејќи го затворскиот полицаец за рака, тој полека излегол надвор поради вртоглавици.

Само неколкумина родители останале во големата судница во Идризово, додека останатите, по барање на судијката, биле изнесени надвор. По кратката пауза и со дозвола на судот, родителите се вратиле во судницата. Јованов, сепак, останал надвор поради неговата состојба, по што била дадена уште една пауза.

— реклама —

На денешното рочиште се сослушува техничкиот советник Петре Русески, кој одговара на прашањата на адвокатката Коцевска, бранителка на Јованов. Русески е ангажиран од одбраната за да го оспори вештачењето на Градежниот факултет поврзано со објектот во кој работела дискотеката „Пулс“.

По паузата, судот треба да одлучи дали ќе повика лекари за да ја проценат состојбата на Јованов и дали рочиштето ќе продолжи.

— реклама —

Притворот на првообвинетиот Дејан Јованов-Деко законски истекува на 3 октомври. Одбраната најави дека ќе понуди гаранција во имот вреден речиси 200 илјади евра, иако тоа не е задолжително.

Во пожарот во дискотеката „Пулс“ во Кочани, на 16 март 2025 година, за време на настапот на групата ДНК, загинаа 63 лица, а повеќе од 200 беа повредени.