Системот „Безбеден град“ од денеска е активен и на подрачјето на СВР Велес, кое ги опфаќа Велес, Кавадарци, Неготино и Демир Капија. За само ден и половина, системот регистрирал 151 сообраќаен прекршок.
Министерот за внатрешни работи Панче Тошковски соопшти дека во саботата биле евидентирани 124 прекршоци, а до денеска напладне уште 27. Најголемиот дел од прекршоците се однесувале на пречекорување на дозволената брзина, додека во само три до четири случаи било регистрирано минување на црвено светло.
Во Велес е отворен и команден центар за системот „Безбеден град“, сместен во целосно реконструираните поранешни простории на Министерството за одбрана.
Тошковски им се заблагодари на граѓаните за, како што рече, одговорното однесување и почитувањето на сообраќајните правила. Тој нагласи дека целта на системот не е зголемување на приходите во државниот буџет, туку зголемување на безбедноста на патиштата.
Според податоците што ги презентираше министерот, „Безбеден град“ веќе дава резултати и преку намалувањето на бројот на жртви во сообраќајни несреќи. Во првите осум месеци од минатата година на патиштата во Македонија животот го загубиле 96 лица, додека во истиот период годинава бројот е намален на 61 жртва.
