Русија во 2026 година останува цврсто на позициите на претседателот Владимир Путин – без извинувања, без каење и без подготвеност за компромиси околу војната во Украина, оценува анализата на Би-Би-Си.
Според текстот, Кремљ и натаму не покажува знаци дека е подготвен да се откаже од своите цели во конфликтот. Напротив, во последниот период Русија повторно изврши масовни ракетни и беспилотни напади врз украински градови, додека Путин продолжува да бара Украина да ја препушти целата област Донбас под руска контрола.
Во анализата се наведува дека во Москва избледела надежта дека американскиот претседател Доналд Трамп ќе помогне да се постигне мировен договор по услови прифатливи за Русија. Иако по средбата меѓу Трамп и Путин во Алјаска минатата година во руските политички кругови се зборуваше за таканаречениот „дух на Енкориџ“, денес таквиот оптимизам речиси целосно исчезнал.
Во меѓувреме, војната што Кремљ ја замислувал како кратка „специјална воена операција“ се претворила во долготраен исцрпувачки конфликт. Русија се соочува со големи човечки загуби, економски притисоци и илјадници меѓународни санкции, додека украинските беспилотни летала сè почесто напаѓаат цели длабоко на руска територија.
И покрај тоа, Кремљ не покажува намера за деескалација. Анализата посочува дека одговорот на Москва на растечките предизвици е дополнително интензивирање на воените операции.
Сепак, во руската јавност и меѓу дел од аналитичарите почнуваат да се појавуваат ставови дека е време да се размислува за завршување на конфликтот. Политичкиот аналитичар Василиј Кашин оценил дека целосното отстранување на украинската власт би барало долгорочна окупација на целата земја, нешто што, според него, е технички неизводливо за Русија.
Слични размислувања се појавиле и во дел од прорежимските медиуми, каде што се отвори дебата дали продолжувањето на војната без јасен крај претставува поголем ризик од евентуален компромис. Но, како што наведува Би-Би-Си, границите на таквата дебата остануваат строго контролирани, а дел од написите што ги доведувале во прашање официјалните цели на војната подоцна биле отстранети од интернет.
