Русија викендов изврши силни напади врз Киев и се закани со нови, со што дополнително го зголеми притисокот врз Украина, анализира Би-би-си.
Москва најави „доследни и систематски удари врз Киев, насочени кон украинскиот воено-индустриски комплекс“, а истовремено ги повика странските државјани и дипломатскиот персонал што побрзо да го напуштат градот.
Од украинското Министерство за надворешни работи велат дека ваквите закани не претставуваат ништо ново, бидејќи Русија веќе повеќе од четири години редовно напаѓа украински градови и населби.
Според Киев, единствено се променил начинот на кој Кремљ ги оправдува нападите.
Москва ја обвини Украина дека минатата недела, во напад врз Старобилск, во Луганската област, намерно убила 21 студент. Украина, пак, тврди дека погодила воен објект на територија под руска окупација.
Во анализата се наведува дека Кремљ сега тој инцидент го користи како оправдување за најавените одмазднички напади.
Воениот аналитичар и поранешен украински разузнавач Иван Ступак смета дека заострувањето на реториката покажува дека Москва има проблеми со контролата на наративот за војната.
„Кога имате проблеми со економијата и во руското општество, се создава притисок за одмазда“, изјави тој.
Андриј Коваленко од украинскиот Совет за национална безбедност и одбрана оценува дека Русија се обидува да изврши психолошки притисок врз Украина, но и врз западните сојузници.
Според него, Кремљ сака да го одвлече вниманието од украинските далекусежни напади врз руска територија и од сопствените проблеми во одбраната.
Би-би-си наведува дека војната во моментов не се одвива во насоката што Москва ја посакува.
Институтот за проучување на војната (ISW) проценува дека Русија трпи сѐ поголеми загуби за сѐ помали територијални придобивки, а бројот на загинати руски војници веќе неколку месеци го надминува бројот на нови регрути.
Во меѓувреме, Киев сѐ уште се опоравува од последниот голем руски напад, во кој беа лансирани речиси 600 дронови и 90 ракети, главно насочени кон украинската престолнина.
Украинската противвоздушна одбрана успеала да собори поголем дел од дроновите, но 35 ракети ги погодиле целите.
Во нападот, според извештаите, Русија употребила и најмалку една хиперсонична ракета „Орешник“, која тешко може да биде пресретната со постојните системи за противвоздушна одбрана.
Украинскиот претседател Володимир Зеленски повторно побара од западните сојузници дополнителни системи за противвоздушна одбрана, нагласувајќи дека недостигот од ракети-пресретнувачи останува еден од најголемите проблеми за Украина.
