БИРН: Над 111.000 евра од Србија за здруженија во Македонија чии претставници го поддржуваат Вучиќ

Најмалку 111.700 евра од државни институции на Србија завршиле кај три здруженија во Македонија чии претставници јавно го поддржуваат српскиот претседател Александар Вучиќ и неговата Српска напредна странка (СНС), покажува истражувањето на Балканската истражувачка репортерска мрежа (БИРН).

Парите биле доделени преку Управата за дијаспора при Министерството за надворешни работи на Србија, главно за проекти поврзани со културата, православната вера, зачувувањето на кирилицата и српскиот идентитет.

Меѓу корисниците е кумановското здружение „Мир, слога, стабилност“, кое на 23 мај организирало собир за поддршка на Вучиќ. На собирот присуствувале неколку стотици луѓе со македонски и српски знамиња, како и маици со партискиот слоган на СНС „Србија победува“.

— реклама —

Претседателката на здружението, Маја Денковска, тогаш изјавила дека целта на собирот е да му се даде поддршка на Вучиќ да истрае на патот кон мирот, слогата, стабилноста и единството.

Според истражувањето, само 38 дена пред собирот здружението добило 3.400 евра од српската Управа за дијаспора за православни верски проекти. Неколку недели подоцна му биле доделени уште 2.500 евра за зачувување на кирилицата.

БИРН наведува дека истото здружение во април минатата година организирало бесплатни автобуси и сендвичи за граѓани од Куманово кои патувале на партиски собир на СНС во Белград. Според истражувањето, здружението и претходно организирало патувања од Македонија на собири на партијата на Вучиќ.

— реклама —

Денковска одбила да разговара со БИРН, наведувајќи здравствени причини.

Најголемата сума меѓу трите наведени здруженија во Македонија ја добил Српскиот културен центар – Скопје: 84.500 евра од 2023 година. Неговата претседателка Василка Китановиќ, според БИРН, редовно објавува содржини поврзани со СНС на социјалните мрежи. Таа не одговорила на барањата за коментар.

— реклама —

Друг корисник е Заедницата на Србите во Македонија – Битола, која од 2023 година добила 21.300 евра. Нејзиниот претседател Зоран Жугиќ, според истражувањето, јавно ги критикува студентските протести во Србија и организацијата за набљудување избори ЦРТА, а споделувал и содржини со кои се негира геноцидот во Сребреница.

Жугиќ негирал дека средствата биле користени за политички цели.

„Тоа се исклучиво проекти поврзани со културата, фолклорот, одбележувањето историски датуми, спортски манифестации и слично – активности што немаат врска со политичките случувања“, изјавил тој за БИРН.

Истражувањето опфаќа и организации во Србија и Босна и Херцеговина. Според БИРН, српската Управа за дијаспора во последните три години доделила најмалку 250.000 евра на организации од трите земји чии претставници јавно ја промовираат СНС, шират проруски наративи или застапуваат крајнодесничарски ставови.

БИРН не утврдил дека сите доделени средства биле директно потрошени за партиски активности, но укажува на поврзаноста меѓу државното финансирање и јавната политичка поддршка што ја даваат претставниците на дел од здруженијата.

Министерството за надворешни работи на Србија и Управата за дијаспора не одговориле на барањата за коментар.