Битиќи: Единствената стабилна работа во економската политика на Владата е нестабилноста на нејзините буџетски планови

Пратеникот на СДСМ, Фатмир Битиќи, го критикуваше вториот ребаланс на Буџетот за 2026 година, оценувајќи дека честите промени на буџетските планови ја покажуваат нестабилноста на економската политика на Владата.

На седницата на собраниската Комисија за финансирање и буџет, Битиќи посочи дека за неполни десет месеци биле предложени три различни буџетски конструкции, додека дефицитот останува повисок од првично планираниот, а средствата за капитални инвестиции се намалуваат.

— реклама —

Тој потсети дека првично планираниот дефицит од 39,239 милијарди денари, односно 3,5 проценти од БДП, со јулскиот ребаланс бил зголемен на 46,264 милијарди денари или 4,1 процент од БДП. Со октомврискиот ребаланс останува на истото ниво. Истовремено, капиталните расходи се намалуваат за 5,755 милијарди денари, на 40,124 милијарди денари.

— реклама —

Според Битиќи, ова покажува дека дополнителниот дефицит повеќе не се користи за зголемување на капиталните инвестиции, туку за покривање на тековните расходи. Тој предупреди и на намалување на средствата за малите и средните претпријатија, технолошко-индустриските развојни зони, странските инвестиции, регионалниот развој, енергетиката и образовната инфраструктура.

Битиќи се осврна и на движењето на странските директни инвестиции, наведувајќи дека тие се намалиле од 218,6 милиони евра во првиот квартал на 18,7 милиони евра во вториот квартал од 2026 година. Тој додаде дека расходите за камати изнесуваат 21,094 милијарди денари, што е повеќе од половина од планираните капитални расходи.

— реклама —

Пратеникот предупреди дека јавниот долг на 30 јуни достигнал 10,726 милијарди евра и оцени дека до крајот на годината може да надмине 11 милијарди евра. Од министерката за финансии побара објаснување за начинот на кој дополнителните најавени задолжувања се евидентираат во јавниот долг.

Тој побара и конкретен план за исплата на доспеаните, а неплатени обврски на јавните субјекти, кои во јуни изнесувале 42,66 милијарди денари, како и поголема транспарентност за обврските опфатени со ребалансот. Според него, одложувањето на државните плаќања, вклучително и повратот на ДДВ, може да ја загрози ликвидноста на компаниите.

Битиќи порача дека последиците од лошото буџетско планирање не се сведуваат само на бројките, туку и на пропуштените можности за економски развој, кои, како што рече, на крајот ги плаќаат граѓаните.