(Видео) Битиќи до Јанкуловски: Како ќе им помогнете на граѓаните откако го одбивте нашиот предлог за 600 евра минимална плата?

Растечките трошоци за живот и недоволните приходи на работниците беа во фокусот на денешната собраниска седница за опозициски пратенички прашања, на која пратеникот на СДСМ, Фатмир Битиќи, побара од Владата да понуди конкретно решение по одбивањето на предлогот за минимална плата од 600 евра.

Во отсуство на министерката за финансии Гордана Димитриеска-Кочоска, Битиќи му се обрати на заменик-министерот за финансии Николче Јанкуловски, прашувајќи каква финансиска алтернатива предвидува Владата за да можат барем две минимални плати да ги покријат основните животни трошоци.

Според Битиќи, додека Владата ја одбива иницијативата на СДСМ за повисока минимална плата и ја претставува својата пресметка на потрошувачката кошница, граѓаните секој месец се соочуваат со сè поголем јаз меѓу примањата и трошоците за живот.

— реклама —

Тој се повика на податоците за синдикалната минимална кошница, кои, како што рече, покажуваат дека куповната моќ на граѓаните значително се влошила. Во ноември 2023 година, за покривање на кошницата биле потребни 2,2 минимални плати, додека во септември 2026 година се потребни 2,7 плати, односно 3,26 минимални плати доколку се вклучи и киријата.

„Септемвриската кошница од 69.432 денари бара 2,7 минимални плати од 26.046 денари, а со кирија таа бара 3,26 минимални плати. Значи, две минимални плати оставаат недостиг од 17.340 денари месечно за покривање на основните трошоци, и тоа без киријата. Само храната и пијалаците чинат 25.259 денари, односно 97% од една минимална плата“, рече Битиќи.

Тој предупреди дека забавувањето на инфлацијата не значи и поевтинување на животот, ниту, пак, враќање на претходно изгубената куповна моќ. Според него, цените на храната продолжуваат да растат, а последиците најсилно ги чувствуваат домаќинствата со најниски приходи.

— реклама —

Битиќи посочи дека во 2025 година храната поскапела за 5,2 отсто, што е за 1,1 процентен поен повеќе од тогашната општа инфлација од 4,1 отсто. Во септември годинава инфлацијата изнесувала 2,7 отсто, но цените на храната дополнително пораснале за 0,5 отсто само во текот на еден месец.

„Но, побавното поскапување не ја врати претходно изгубената куповна моќ“, нагласи Битиќи.

Тој оцени дека одбивањето на предлогот на СДСМ за минимална плата од 600 евра дополнително го влошува животниот стандард, посочувајќи дека наместо конкретни мерки за зголемување на приходите на работниците, Владата не понудила решение што ќе им овозможи на семејствата достоинствено да ги покриваат месечните потреби.

— реклама —

„И овој надолен тренд на пад на животниот стандард го забрзаа вашите сопартијци и коалициски партнери во Собранието, кои го одбија нашиот предлог за минимална плата од 600 евра“, рече Битиќи.

Пратеникот се осврна и на пресметката на Министерството за економија, според која просечната потрошувачка кошница за август изнесувала 58.475 денари, што е за 10.200 денари помалку од синдикалната кошница за истиот месец.

Тој ја оцени оваа пресметка како „розова“ математика, која не ја прикажува целосно реалната состојба со животниот стандард. Битиќи посочи дека дури и според пониската пресметка на Министерството, две минимални плати не се доволни за покривање на трошоците, при што недостигаат 6.383 денари.

„И оваа „посебна“ просечна потрошувачка кошница покажува колку се потрошило, без самата по себе да утврди дали потребите се достоинствено задоволени“, рече тој.

Битиќи порача дека животниот стандард не треба да се оценува само преку статистичките податоци за потрошувачката, туку пред сè преку реалната можност на граѓаните да ги задоволат основните потреби. Тој побара Владата да понуди конкретна финансиска алтернатива за работниците, наместо да го отфрла предлогот за повисока минимална плата без да обезбеди решение за растечките трошоци за живот.