„Нова манипулација на Мицкоски за БДП, со инфлација од 5,7% животниот стандард паѓа“, вели Битиќи

Пратеникот на СДСМ, Фатмир Битиќи, на денешната прес-конфренција ја обвини Владата дека ја манипулира јавноста со податоците за економскиот раст, оценувајќи дека растот на бруто-домашниот производ не се одразува врз животниот стандард на граѓаните.

На прес-конференција, Битиќи посочи дека и покрај објавениот раст на БДП од 3,1 проценти во првиот квартал од годинава, инфлацијата од 5,7 проценти значи дека цените растат побрзо од економијата.

— реклама —

Според него, зголемената потрошувачка не е резултат на подобар животен стандард, туку на поскапувањата на основните производи и услуги.

„Кога граѓаните плаќаат повеќе за истите производи, номиналната потрошувачка расте, но тоа не значи подобар живот, туку поскап живот“, истакна Битиќи.

— реклама —

Тој нагласи дека храната и безалкохолните пијалаци бележат годишен раст на цените од околу осум проценти, додека инфлацијата во Македонија е значително повисока од просекот во Европската Унија и еврозоната.

— реклама —

Битиќи се осврна и на индустриското производство, посочувајќи дека иако во април е регистриран раст од 7,6 проценти, во претходните месеци биле забележани падови, а бројот на вработени во индустријата продолжува да се намалува.

Според СДСМ, растот во градежништвото исто така не носи подобрување на животниот стандард, бидејќи цените на становите во Скопје се повисоки за 16,7 проценти во споредба со истиот период лани.

Битиќи предупреди и на намалување на странските директни инвестиции и на раст на јавниот долг, оценувајќи дека економскиот модел на Владата се потпира на потрошувачка и задолжување, наместо на одржлив развој.

„Вистински економски напредок има само кога граѓанинот со својата плата може да купи повеќе, да живее посигурно и да планира иднина без страв од висината на следната сметка“, порача Битиќи.