Бивш фудбалер ќе се бори за прв човек на ФИФА, изборите во март 2027 година

Рамон Вега (55), поранешен фудбалер, ја најави својата кандидатура за претседател на ФИФА на изборите кои ќе се одржат следната година, со што стана првиот кандидат кој јавно потврди дека ќе се обиде да му се спротивстави на Џани Инфантино.

Вега е поранешен репрезентативец на Швајцарија, а во текот на кариерата настапувал за Грасхоперс, Каљари, Тотенхем, Селтик, Вотфорд и Кретeј. Професионалната кариера ја завршил во 2004 година, по што главно се занимавал со финансии.

— реклама —

„Се кандидирав за повторно да го обединам глобалното фудбалско семејство, да спроведам вистински и трајни реформи, да ја модернизирам ФИФА и да ја вратам стабилноста и кредибилитетот, како и довербата која итно му е потребна на нашиот спорт“, изјави Вега во соопштението со кое ја објави кандидатурата.

Инфантино минатиот месец порача дека е „целосно посветен на водењето на ФИФА“, и покрај повиците од УЕФА, КОНКАКАФ и Азиската фудбалска конфедерација да поднесе оставка.

Вега ја разгледувал можноста да се кандидира за претседател на ФИФА и во 2015 година, по суспензијата на тогашниот претседател Сеп Блатер.

— реклама —

Четири години подоцна најавил дека ќе се кандидира против Инфантино, но не успеал да ја обезбеди потребната поддршка за учество на изборите. За кандидатурата тогаш било потребно да добие поддршка од најмалку пет од 211 членки на ФИФА.

„Се кандидираm затоа што мојот живот ме подготви да му служам на фудбалот“, навел Вега.

— реклама —

Тој истакнал дека фудбалот не им припаѓа на претседателите, конфедерациите или администраторите, туку на играчите, тренерите, судиите, навивачите, клубовите, лигите, федерациите и заедниците ширум светот.

„Фудбалот мора секогаш да биде на прво место. Сепак, поделбите предолго го разединуваа нашето фудбалско семејство. Актуелното раководство го демотивираше спортот, додека лошото управување го наруши кредибилитетот на ФИФА и довербата во целото фудбалско семејство“, порача Вега.

Поранешниот швајцарски репрезентативец оценил и дека конфликтите во фудбалската администрација не смеат да ги загрозуваат играчите, тренерите, судиите и навивачите.

— реклама —

„Фудбалот е во одделението за интензивна нега, на апарати за одржување во живот. Не можеме повеќе да чекаме. На ФИФА ѝ е потребен нов правец и суштинска реформа. Мора повторно да го обединиме фудбалското семејство, да ја вратиме довербата, да обезбедиме стабилност и да го модернизираме управувањето со ФИФА. Потребни се одлучни промени, а не козметички“, заклучил Вега.

Изборите за претседател на ФИФА се закажани за 18 март 2027 година во Рабат, Мароко.