ФИФА го смени оперативниот директор кој го критикуваше Инфантино

ФИФА го разреши оперативниот директор Кевин Ламур, откако тој јавно го критикуваше претседателот Џани Инфантино поради планот за продажба на удел во Светското првенство. Ламур претходно ги обвини челниците на организацијата дека вработените биле „доведени во заблуда“ и дека заслужуваат подобар однос, наместо „презир и заплашување“.

— реклама —

Од ФИФА не ги коментираа условите под кои Ламур ја напуштил организацијата. Во официјалното соопштение само се наведува дека неговиот работен однос завршил на 17 август, по две години поминати во организацијата.

За неговото заминување вработените биле известени во понеделникот вечерта. Во интерна порака, генералниот секретар на ФИФА, Матијас Графстром, навел дека одлуката била донесена по неодамнешни разговори и со голема почит кон Ламур, како на професионален, така и на личен план.

— реклама —

Ламур се приклучил на ФИФА во ноември 2024 година, а претходно бил дел од најблискиот круг на соработници на Инфантино. Тој ја водел и неговата кампања за победата на претседателските избори во ФИФА во 2016 година.

— реклама —

Неговото заминување доаѓа во период на сериозни поделби околу планот на Инфантино за продажба на удели во Светското првенство на приватни инвестициски фондови. Предлогот, вреден околу 20 милијарди долари, беше повлечен по силниот отпор, а УЕФА дури се закани со бојкот на натпреварувањата под покровителство на ФИФА.

Ламур во јули јавно ја критикуваше нетранспарентноста околу планот и порача дека вработените заслужуваат поголема почит. Неговата изјава уследи непосредно по оставката на високиот советник на Инфантино, Карлос Кордеиро, кој исто така ги повика функционерите на ФИФА јавно да зборуваат за спорниот предлог.

Минатата недела УЕФА, Азиската фудбалска конфедерација и КОНКАКАФ побараа преиспитување на постапките на Инфантино. Тој во меѓувреме се извини за планот, но и понатаму ја има поддршката од африканската и јужноамериканската фудбалска конфедерација.