Германскиот фудбалски сојуз против Инфантино: „Мора да му се стави крај на неговиот систем“

Односите меѓу Германскиот фудбалски сојуз и претседателот на ФИФА, Џани Инфантино, се сериозно нарушени, откако германската страна остро се спротивстави на плановите за приватни инвестиции во натпреварувањата под закрила на светската фудбалска организација.

Претседателот на Германскиот фудбалски сојуз, Бернд Нојендорф, изјави дека на „Инфантиновиот систем“ мора да му се стави крај и дека неговото укинување е императив.

— реклама —

„Важно е да му се стави крај на тој ’Инфантинов систем’. Укинувањето на тој систем е императив“, изјави Нојендорф за РТЛ.

— реклама —

Тој посочи дека германскиот сојуз воопшто не бил консултиран за планираната продажба на удели во Светското првенство на приватни инвеститори, поради што, според него, е нарушена довербата во Инфантино и актуелното раководство на ФИФА.

Инфантино на 1 август се откажа од проектот „FIFA Forward Enterprise“ по силниот отпор предводен од Европската фудбалска унија (УЕФА).

— реклама —

„Воопшто не бевме консултирани во врска со планираната продажба на удели во Светското првенство на приватни инвеститори. Односот на доверба со Инфантино и со ова раководство на ФИФА е, секако, нарушен“, изјави Нојендорф на маргините на состанокот на Извршниот комитет на УЕФА во Солун.

Инфантино планира повторно да се кандидира за претседател на ФИФА на изборите што треба да се одржат во март следната година. Според германските медиуми, УЕФА се очекува до 18 ноември да предложи кандидат кој би му се спротивставил.

Состанокот на националните фудбалски сојузи членки на УЕФА е закажан за 8 и 9 октомври во Берлин. Нојендорф најави дека најдоцна тогаш ќе бидат донесени „важни одлуки“ за ова прашање, при што истакна дека потенцијалниот противкандидат на Инфантино треба да биде личност со „беспрекорен интегритет“.