Фудбалската асоцијација на Ирска (FAI) ја повлече поддршката за Џани Инфантино за нов мандат на чело на ФИФА, откако нејзиниот управен одбор оцени дека последните случувања отвораат сериозни прашања околу управувањето и транспарентноста.
FAI го повлече писмото за поддршка испратено на почетокот на годинава, и за одлуката веќе ја информирала ФИФА. Ирската федерација соопшти дека, иако ја цени поддршката што ФИФА му ја дава на ирскиот фудбал, неодамнешните настани предизвикале загриженост поради недостатокот на транспарентност и консултации.
Одлуката доаѓа по контроверзниот предлог на Инфантино за основање на компанијата „FIFA Forward Enterprise“, која требаше да управува со комерцијалните и оперативните активности поврзани со турнирите на ФИФА. Планот предвидуваше и продажба на 20 отсто од акциите во организацијата на Светските првенства на приватни инвеститори.
Иако Инфантино неодамна се извини за предлогот, притисокот врз него да ја напушти функцијата продолжува да расте. Оставка од него побарале и УЕФА, АФЦ и КОНКАКАФ.
Од друга страна, Катар, Либан, Мароко, Судан, Египет и Мавританија изразија поддршка за Инфантино, истакнувајќи ги неговите напори за развој и глобална промоција на фудбалот.
Претседателот на Африканската фудбалска конфедерација (КАФ), Патрис Мотсепе, смета дека евентуалната иднина на Инфантино на чело на ФИФА треба да се реши преку избори. Тој порача дека сите 211 членки на ФИФА треба да имаат можност да го кажат својот став на претседателските избори, кои треба да се одржат во март следната година.
