БиХ упати протестна нота до Хрватска поради собир за воспоставување „трет ентитет“ во Босна

Министерството за надворешни работи на Босна и Херцеговина упати протестна нота до Министерството за надворешни и европски работи на Хрватска, изразувајќи незадоволство поради собирот што се одржал во Загреб, на кој била претставена идејата за воспоставување „трет ентитет“ во БиХ, пишува Хина.

Во нотата, во која увид имала Хина, се наведува дека МНР на БиХ изразува сериозна загриженост поради изјавите и пораките на ТрадиФест одржан на 25 април во Загреб, организиран под покровителство на цивилниот сектор, „но со присуство на претставници на властите“.

— реклама —

Се истакнува дека на тој собир биле изнесени ставови кои имплицираат стремежи кон промени на уставниот поредок на Босна и Херцеговина, што МНР на БиХ го смета за недозволиво и спротивно на нејзиниот уставен поредок.

— реклама —

Се наведува дека Босна и Херцеговина останува цврсто определена за заштита на својот суверенитет и територијален интегритет и дека ваквите пораки не придонесуваат за добрососедски односи ниту за меѓусебна доверба.

Додадено е дека граѓаните на БиХ се „вознемирени и загрижени“ од таквите изјави и дека тие можат негативно да влијаат врз состојбата во земјата.

— реклама —

Во министерството на чело со Елмедин Конaковиќ тие изјави ги оценуваат како штетни за регионалната стабилност и билатералните односи со Хрватска.

— реклама —

МНР на БиХ очекува официјална реакција од надлежните тела на Република Хрватска и „јасно оградување од изнесените ставови“.

Се наведува и дека Босна и Херцеговина останува посветена на европските и евроатлантските интеграции, при што потенцира дека евентуалните уставни реформи можат да ги водат исклучиво нејзините институции, во согласност со пресудите на Европскиот суд за човекови права, препораките на Венецијанската комисија и стандардите на Европската конвенција за човекови права.