(Видео) Се урна воен хеликоптер на Еуфор во БиХ, четворица загинати и 11 повредени

Снимка од моментот на уривањето на воен хеликоптер на Еуфор во Босна и Херцеговина се појави на социјалните мрежи. Несреќата се случила попладнево во Горица, во близина на Брчко, при што загинале четири лица, а 11 биле повредени.

— реклама —

На видеото се гледа леталото непосредно пред падот. Според очевидци, хеликоптерот почнал неконтролирано да се врти во воздухот, по што се урнал на земја. Снимката ја објави и босанскохерцеговскиот весник „Дневни аваз“.

Градоначалникот на Брчко, Синиша Милиќ, потврдил дека во несреќата загинале четири лица, а 11 се повредени. Повредените биле пренесени во здравствениот центар во Брчко. Според локалните медиуми, сите загинати и повредени се италијански државјани.

— реклама —

Полицијата, пожарникарите и екипите на итната медицинска помош пристигнале на местото на несреќата, а поширокото подрачје било обезбедено.

— реклама —

Од Еуфор потврдиле дека нивен хеликоптер се урнал за време на рутинска операција. Според нивното соопштение, нема повредени цивили ниту оштетувања на цивилна инфраструктура, имот или возила.

Според медиумските информации, станува збор за транспортен хеликоптер ЦХ-47 „Чинук“, кој го користи италијанската армија во рамките на мисијата Алтеа на Еуфор во Босна и Херцеговина. Причината за несреќата засега не е позната, а Еуфор отвори истрага.