Судскиот совет расправаше за изборот на вршител на должност претседател на Апелациониот суд Скопје, откако досегашната претседателка Мери Дика Георгиевска беше избрана за уставен судија. Во дебатата беа предложени двајца кандидати – судијката Тања Милева и судијата Зоран Герасимовски, а членовите на Советот изнесоа различни аргументи во нивна полза.
„Имав во предвид кој како може да се справи со менаџерски работи. Јас ја предлагам колешката Тања Милева. Таа е од 2019 година судија таму и мислам може да се справи со таа функција, која треба да трае што пократко во рамки на законскиот рок“, рече членката на Судскиот совет, Антоанета Димовска.
Од друга страна, членот на Судскиот совет Ивица Николовски го предложи судијата Зоран Герасимовски.
„Го предлагам судијата Зоран Герасимовски да биде определен за вршител на должност на Апелација-Скопје. Станува збор за искусен судија, покажува позитивни резултати, секогаш бил оценуван позитивно“, рече Николовски, кој ги истакна и неговите менаџерски способности.
Во расправата се вклучи и членката на Судскиот совет, Сузана Јошевска, која посочи дека при изборот треба да се земат предвид оценувањата на судиите.
„Ако се тргне од целта на одредбата во законот, треба да го одбереме судијата кој на последното оценување добил најмногу поени бидејќи на тој начин ние бираме судија чиј професионален квалитет е објективно утврден, во однос на останатите судии. Според табелата на оценување која ја добив од службите, во 2022 година се оценети само тие судии кои биле активни. Од судиите кои биле активни во тој период, Тања Милева е највисоко бодувана, останатите се во Врховниот суд или пензиониери судии, а биле високо бодувани. Не може да ги земеме во предвид судиите од Кривичен суд бидејќи тие се избрани во 2024 година и не се бодувани сега. Ако отстапиме од овој член треба да имаме добро образложение зошто треба да биде друг предлог. Судијата Зоран Герасимовски е бодуван со 186 бодови. Факт е дека во моментот имаме судија кој може да биде предлог согласно закон и да го пополни ова место. А сите судии ќе можат да се пријават на конкурс за претседател“, рече Јошевска.
На ова возврати Николовски, кој оцени дека и покрај тоа што Герасимовски не бил оценуван во последната година поради ангажманот во Судскиот совет, неговите резултати остануваат високи.
„Овие бодови се од три години на неговиот труд и оценување. Последната година, овој колега беше член на Судски совет. И покрај тоа што беше оценет за три години, може да констатираме дека има еден квалитет, кој и со една година неземени резултати од работа е високо бодиран“, рече Николовски.
Во текот на седницата имаше и технички проблеми. Членките на Судскиот совет Тања Чачарова-Илиевска и Антоанета Димовска, кои беа вклучени онлајн, не можеа добро да ја следат расправата поради проблеми со звукот. Поради тоа, претседателот на Судскиот совет, Александар Камбовски, даде петминутна пауза.
„Јосиф да проба да намести звучник“, рече Камбовски, образложувајќи ја паузата за да може онлајн вклучените членови непречено да ја следат седницата.
