Канадската покраина Алберта, позната по богатите резерви на нафта, во октомври ќе одржи референдум поврзан со можноста за напуштање на Канада.
Премиерката на Алберта, Даниел Смит, изјави дека гласањето формално нема да биде директен референдум за независност, туку за тоа дали треба да се отвори пат за одржување обврзувачки референдум за отцепување.
„Сакам да бидам јасна. Јас сум за Алберта да остане дел од Канада и така би гласала доколку има референдум за отцепување“, изјави Смит во телевизиско обраќање.
Граѓаните ќе одговараат на прашањето дали Алберта треба да остане во Канада или да преземе правни чекори, согласно Уставот, за организирање обврзувачки референдум за напуштање на федерацијата.
Професорот по политички науки Иан Броди оцени дека Смит настапува внимателно.
„Се гласа за тоа дали луѓето сакаат гласање. Тоа е начин колебливите гласачи полесно да се дистанцираат од идејата за независност“, рече Броди.
Дури и ако евентуален иден референдум успее, тоа автоматски не би значело независност на Алберта. Според одлука на канадскиот Врховен суд од 1998 година, ниту една покраина не може еднострано да се отцепи од Канада, туку би следеле преговори со федералната влада.
Политичкиот аналитичар Даниел Беланд од Универзитетот „Мекгил“ ја спореди ситуацијата со британскиот референдум за Брегзит и улогата на тогашниот британски премиер Дејвид Камерон.
„Смит очигледно се обидува да го смири делот од својата партија кој бара референдум, бидејќи во спротивно би можела да се соочи со сериозен внатрешен бунт“, рече Беланд.
Федералната влада на канадскиот премиер Марк Карни во меѓувреме соработува со Алберта околу изградба на нафтовод кон пацифичкиот брег, проект кој е важен за жителите на покраината.
„Интересите на Алберта и на сите Канаѓани најдобро се заштитени кога работиме заедно“, изјави федералниот министер Доминик Леблан.
Според анкетите, поддршката за отцепување на Алберта моментално е помала од 30 проценти, но аналитичарите предупредуваат дека самата кампања може значително да влијае врз јавното мислење.
