По 55 години Канада ја укинува програмата со кучиња трагачи во Карпестите Планини

По 55 години работа, Канада ја укинува програмата со кучиња трагачи во Карпестите Планини, а одлуката за затворање на последниот преостанат тим во националниот парк Банф предизвика незадоволство во јавноста. Мерката е дел од пошироките владини буџетски кратења, објави Би-Би-Си.

Скот Ворд, кој 17 години работел како водич на кучиња трагачи во планините, се присетува на бројните успешни спасувачки акции. Негово куче еднаш пронашло изгубени деца во густа шума, а во друга прилика го одвело до маж со скршена нога, кој бил на работ на смрзнување.

— реклама —

Денес 73-годишниот пензионер бил шокиран кога дознал дека програмата целосно ќе биде укината на крајот од месецот. Со текот на годините, таа била сведена на само едно работно место за водич на кучиња.

Од агенцијата „Паркс Канада“ потврдиле дека укинувањето на последното работно место во националниот парк Банф било тешка одлука. Паркот годишно го посетуваат повеќе од четири милиони луѓе. Од агенцијата наведуваат дека мерката е дел од модернизацијата на одделот за спроведување на законите и дека потрагите и спасувачките акции ќе продолжат со други методи.

— реклама —

Одлуката предизвика реакции, а петицијата за зачувување на програмата, покрената во вторникот, ја потпишале повеќе од 5.000 луѓе. Конзервативниот пратеник Вилијам Стивенсон, кој ја покренал иницијативата, смета дека укинувањето може да ја загрози јавната безбедност.

Кучињата трагачи имале особено важна улога при лавини, кои во зимските месеци се честа појава во овој дел на Канада. Тие барале планинари и скијачи затрупани под снегот, а во летниот период помагале во пронаоѓањето деца што се оддалечиле од камповите.

— реклама —

Според Ворд, кучињата можеле да откријат сè – од мали предмети и чаури до човечки тела. Нивната работа значително го скратувала времето на потрагата и ја намалувала опасноста за спасувачките екипи, кои инаку морале рачно да го пребаруваат снегот, изложувајќи се на ризик од нови лавини.

Последното службено куче во програмата, германскиот овчар Лерој, заминало во пензија во август. Во текот на седумгодишната служба следело траги на 156 лица, пронашло 57 луѓе изгубени во дивината и помогнало во разрешувањето на два случаи на убиства во Банф.

Ново куче веќе било обучено и подготвено за служба кога минатата недела било објавено дека програмата се укинува поради буџетски кратења во вредност од 145 милиони канадски долари. Во меѓувреме, Стивенсон го покренал прашањето и во канадскиот парламент и најавил дека ќе продолжи да бара решение.

Поранешниот водич Ворд се надева дека програмата сепак ќе биде обновена. Тој се присетил на зборовите на искусен чувар на паркот кој го обучувал: „Можете да направите пазувата да мириса на јоргован и да испратите човек на Месечината, но ништо не може да го замени носот на кучето трагач“.