(Видео) Најмалку седум загинати и десетици повредени во експлозија и пожар во канадска воена база

Најмалку седум лица загинаа, а десетици се повредени во тешка несреќа во канадската воена база Вејнрајт, каде вчера попладне избувнале експлозија и пожар. Поради големиот број повредени, болниците во регионот се под силен притисок, а на терен е активирана обемна акција на итните служби.

Според информации од воени извори што ги пренесува „Глобал њуз“, експлозијата се случила околу 16 часот по локално време, за време на вежба со боева муниција, кога бил погоден гасовод во рамките на базата. Кралската канадска коњичка полиција потврдила дека била повикана поради пожар на воениот полигон, но властите засега официјално не потврдиле дека му претходела експлозија.

Истрагата ја водат војската и полицијата, а сè уште не е познато дали меѓу загинатите и повредените има исклучиво воени лица. Канадските вооружени сили соопштија дека приоритет им е грижата за настраданите и известувањето на нивните семејства, поради што нема да објавуваат детали за жртвите додека не заврши тој процес.

— реклама —

Канадскиот министер за одбрана, Дејвид Мекгинти, синоќа потврди дека има загинати и повредени. Тој ја опиша ситуацијата во базата, која се наоѓа во централниот дел на Алберта, како исклучително сериозна и чувствителна, додавајќи дека не се сеќава на сличен инцидент во поновата историја.

Еден од сведоците опишал силен пламен и хаотични сцени во кои војници ги пренесувале повредените колеги за да ги однесат на безбедно. Доцна синоќа, со падобрани во Вејнрајт биле спуштени повеќе од десет припадници на војската за да помогнат во згрижувањето на настраданите.

— реклама —

Неколку болници во Алберта прогласиле „Код портокалово“, протокол што се активира при катастрофи со голем број повредени. Поради преоптовареноста на здравствените установи во Вејнрајт, голем број повредени биле пренесени во болници во Едмонтон.

Ворен Тирск, лекар во ургентниот центар на болницата „Ројал Александра“ во Едмонтон, за канадската телевизија Си-би-си изјавил дека станува збор за вонредна состојба каква што се случува еднаш на 15 до 25 години. Тој ја опишал ситуацијата како катастрофална, нагласувајќи дека бројот на пациенти е исклучително голем.

Организацијата „Акут кеар Алберта“ ги повикала граѓаните да не го оптоваруваат здравствениот систем доколку тоа не е неопходно, за да се обезбедат доволно места за повредените од базата. Возила на итната медицинска помош од цела Алберта биле пренасочени кон воениот комплекс, а хеликоптерската служба СТАРС испратила екипи од Едмонтон и Саскатун.

Пожарот, поттикнат од силни налети на ветер со брзина до 100 километри на час, брзо се проширил надвор од границите на воениот полигон. Во гаснењето учествувале пожарникари од повеќе околни области, а помош понудила и соседната покраина Саскачеван.

— реклама —

Локалните власти околу полноќ соопштиле дека ширењето на огнот е запрено, но дежурните екипи продолжиле да ја следат состојбата во текот на ноќта. На жителите на блискиот град Вејнрајт, кој има околу 6.600 жители, им било препорачано да се држат подалеку од загрозеното подрачје. Засега не е наредена евакуација.

Поради пожарот било затворено и едно избирачко место во Вејнрајт, каде што се одржувал последниот ден од предвременото гласање на референдумот во Алберта.

Воената база Вејнрајт е еден од најважните канадски центри за обука, а во нејзиниот состав се наоѓа и Канадскиот центар за маневарска обука. Според податоците од пописот во 2021 година, во базата биле распоредени 1.310 воени и цивилни лица.

— реклама —

Началничката на Генералштабот на канадските вооружени сили, генералот Џени Каринјан, порача дека приоритет е благосостојбата на припадниците на војската и нивните семејства. Премиерката на Алберта, Даниел Смит, го опиша настанот како голема трагедија, додека канадскиот премиер Марк Карни изрази сочувство до семејствата на загинатите.

И други политичари, меѓу кои пратеникот Дејн Лојд и лидерот на опозицијата Пјер Поалиевр, им се заблагодарија на итните служби за нивната интервенција и повикаа на поддршка за настраданите и нивните семејства.