Божиновска: Македонските студенти покажуваат дека имаат знаење за големата инженерска сцена

Министерката за енергетика, рударство и минерални суровини присуствуваше на презентацијата на новиот болид на MES Racing, првиот и единствен македонски Formula Student тим, составен од млади инженери и студенти.

На настанот во амфитеатарот на Машинскиот факултет во Скопје, тимот ги претстави резултатите од изминатата сезона, начинот на кој се работело на развојот на болидот во текот на изминатата година, како и новото возило. По презентацијата следуваше и демонстративно возење.

— реклама —

Божиновска истакна дека ваквите проекти покажуваат дека Македонија има млади луѓе со знаење, амбиција и капацитет за создавање сложени инженерски решенија и настап на меѓународната сцена.

„Македонија има иднина. А нејзината иднина се младите. Денес видовме што се случува кога знаењето, идеите, храброста и истрајноста ќе добијат поддршка. Овој болид не е само технички производ – тој е резултат на знаење, тимска работа, посветеност и многу часови вложен труд на овие млади луѓе“, истакна Божиновска.

— реклама —

Таа посочи дека вложувањето во младите инженери, науката, техничкото знаење и иновациите претставува инвестиција во македонската економија и индустрија, бидејќи токму вакви кадри се потребни за создавање современа, конкурентна и технолошки напредна економија.

„Како институции мораме да бидеме поддршка за младите кои создаваат. Нашата задача е да им помогнеме нивното знаење и идеи да добијат можност да се развиваат и да станат дел од реалниот индустриски и економски развој. Не смееме да дозволиме талентот да остане само потенцијал – треба да создадеме услови тој да се претвори во резултат“, порача министерката.

На проектот работат студенти од различни области, кои преку практична работа ги применуваат знаењата од инженерството, машинството, електротехниката и други дисциплини, функционирајќи како вистински инженерски тим.

— реклама —

По презентацијата, тимот MES Racing ѝ врачи благодарница на Божиновска за досегашната поддршка.

„Јас, пак, им благодарам ним – затоа што покажуваат дека младите не се само иднината на Македонија. Тие се нејзиниот сегашен потенцијал. Продолжете да создавате, продолжете да поместувате граници. Македонија има потреба од вас“, порача Божиновска.

Преку учеството на меѓународни натпревари, MES Racing ја претставува Македонија, македонското студентско инженерство и потенцијалот на младите инженери.

Министерството за енергетика, рударство и минерални суровини, како што е наведено, останува посветено на поддршката на младите, науката, иновациите и инженерските иницијативи, со цел создавање нови знаења, современи технологии и кадри кои ќе придонесуваат за развојот на македонската економија.