Гасниот интерконектор со Грција треба да биде готов до средината на 2027 година, со Србија планиран за 2028 година

Изградбата на македонската делница од гасниот интерконектор со Грција треба да заврши до средината на 2027 година, додека поврзувањето со Србија е планирано за 2028 година. Овие рокови ги соопшти министерката за енергетика, рударство и минерални суровини, Сања Божиновска, на министерскиот состанок на Иницијативата за енергетско поврзување на Централна и Југоисточна Европа (CESEC), одржан во Загреб, Хрватска.

— реклама —

Двата проекта се дел од иницијативата „Вертикален гасен коридор“, со што Македонија добива значајна улога во регионалното енергетско поврзување.

— реклама —

На состанокот, на кој учествуваа министри од регионот и претставници на европските институции, се разговараше за енергетската безбедност, диверзификацијата на снабдувањето, обновливите извори и модернизацијата на електроенергетските мрежи.

Божиновска нагласи дека, покрај изградбата на инфраструктурата, потребни се и реформи за усогласување на македонскиот пазар на гас со европските правила. Во тек се активности за воведување современ систем за распределба на капацитетите и балансирање, како и за воспоставување независен оператор на пазарот на гас.

— реклама —

На состанокот била разгледана и можноста за транспорт на водород преку новите интерконектори. Македонија годинава ја заврши Националната студија за водород, со што се создаваат предуслови за развој на идната инфраструктура и поврзување со европските коридори.

— реклама —

„Енергетската безбедност и диверзификацијата повеќе не се само стратешки опции, туку неопходност. Регионалното поврзување и заедничките инвестиции се клучни за стабилно снабдување, конкурентна економија и долгорочна енергетска сигурност“, порача Божиновска.