Министерката Божиновска ги отфрли како невистинити и тенденциозни тврдењата што СДСМ ги изнесе на прес-конференција на 20 септември, оценувајќи дека со нив, без докази, се нарушуваат нејзината чест, углед и професионален интегритет.
Таа тврди дека повеќе од 12 години нема никаква деловна или приватна поврзаност со „Руднап“, ниту, како што наведува, има каква било врска со предметната набавка или со постапката што ЕВН ја спроведува самостојно за свои потреби.
„СДСМ свесно пласира невистини и измислени конструкции за наводна моја вмешаност во деловни зделки, без да понуди ниту еден факт што би ги поткрепил таквите тврдења“, наведува Божиновска, оценувајќи дека станува збор за политичка дискредитација.
Таа побара од СДСМ во рок од 24 часа јавно да ги повлече тврдењата и да ѝ се извини за нивното изнесување.
Во спротивно, најави преземање правни чекори и користење на сите расположливи механизми за заштита на нејзината чест, углед и професионален интегритет, вклучително и судска постапка и пријави до надлежните институции.
„Јавноста заслужува факти и докази, а не политички конструкции. Јас сум подготвена за секој факт да одговорам и да го докажам. Истото го очекувам и од оние што денес изнесуваат вакви сериозни обвинувања“, порача Божиновска.
