Министерката за енергетика, рударство и минерални суровини Сања Божиновска денеска во Приштина учествуваше на Неформалниот министерски совет на Енергетската заедница, каде што со министрите од регионот, претставници на Европската комисија и Секретаријатот на Енергетската заедница разговараше за интеграцијата на земјите од Западен Балкан во европскиот енергетски пазар, енергетската безбедност и регионалната соработка.
Во своето обраќање, Божиновска истакна дека енергетската безбедност не може да се обезбеди поединечно и дека регионот треба да се поврзе преку заедничка инфраструктура, усогласени политики и заеднички инвестиции.
„Нашата долгорочна визија е целосно интегриран регионален енергетски систем кој ќе ги поврзе електроенергетските, гасните и идните водородни мрежи. Од диверзификација до декарбонизација, регионот мора да функционира како еден интегриран енергетски систем“, порача министерката.
Таа нагласи дека Македонија веќе презема конкретни чекори за зајакнување на енергетската сигурност преку диверзификација на изворите на снабдување и реализација на стратешки инфраструктурни проекти. Според неа, гасниот интерконектор со Грција треба да биде завршен до 2027 година, додека интерконекторот со Србија е во фаза на подготовка за реализација и се очекува да биде завршен околу 2028 година. Со нив ќе се обезбеди пристап до нови извори на природен гас, вклучително и течен природен гас (LNG), што ќе ја зголеми сигурноста и отпорноста на енергетскиот систем.
Осврнувајќи се на интеграцијата во европскиот пазар на електрична енергија, Божиновска потсети дека Македонија во мај годинава го пушти во употреба интрадневниот пазар на електрична енергија, што претставува значаен чекор кон целосно поврзување со европскиот пазар и подобра интеграција на обновливите извори на енергија.
На состанокот бил поздравен и напредокот што Македонија го постигнала во усогласувањето на енергетското законодавство со европските правила, при што било нагласено дека навременото завршување на овој процес ќе овозможи уште посилна интеграција на националниот пазар во единствениот европски енергетски систем.
Божиновска порача дека интеграцијата во европскиот енергетски пазар претставува можност за поголема конкурентност на економијата, привлекување инвестиции и обезбедување почиста и посигурна енергија за граѓаните, додавајќи дека Македонија останува посветена на реформите и регионалната соработка.
На министерскиот состанок беше потенцирана и потребата од забрзана диверзификација на снабдувањето со природен гас, зајакнување на регионалните интерконекции и координирани политики за поголема отпорност на енергетските системи. Министрите оценија дека инвестициите во нова енергетска инфраструктура, домашното производство и регионалната солидарност ќе бидат клучни за стабилно и одржливо снабдување со енергија во иднина.
