Министерката за енергетика, рударство и минерални суровини Сања Божиновска учествуваше на UNECE Resource Management Week 2026, каде се обрати пред претставници, експерти и креатори на политики од повеќе земји, соопштија од Министерството.
Во своето обраќање, таа истакна дека одржливото управување со ресурсите претставува неопходност во услови на глобални енергетски и климатски предизвици, стои во соопштението.
„Се наоѓаме во период на длабока трансформација на енергетскиот систем. Климатските промени, енергетската сигурност и економската отпорност се поврзани, но воедно нудат и можности за одржлив развој“, посочи Божиновска.
Таа нагласи дека државата направила значаен институционален исчекор со формирањето на Министерството за енергетика, оценувајќи дека тоа е стратешки чекор за подобро управување со ресурсите, стои во соопштението.
„Енергетиката ја поставивме во срцето на националните политики“, истакна министерката.
Божиновска посочи дека се реализираат конкретни проекти за зајакнување на енергетската безбедност, вклучително и гасното поврзување со Грција, како и планираната интерконекција со Србија, стои во соопштението.
Паралелно, како што стои во соопштението од Министерството, се вложува во развој на обновливи извори на енергија, особено во соларни и ветерни капацитети, како и во зголемување на енергетската ефикасност. Во рударството, фокусот е ставен на одговорно користење на ресурсите согласно меѓународните стандарди.
Во обраќањето беше потенцирана и важноста на меѓународната соработка.
„Ниту една држава не може самостојно да ги надмине предизвиците на енергетската транзиција. Партнерствата и размената на знаење се клучни“, порача Божиновска.
Таа потсети дека Скопје беше домаќин на 14-тиот Меѓународен форум за енергија и одржлив развој, со што, како што рече, се зајакнува позицијата на земјата како регионален партнер, стои во соопштението.
На крајот, министерката упати повик за поголема решителност и заедничка акција во справувањето со глобалните предизвици, нагласувајќи дека одржливоста е процес што бара континуирана посветеност, стои во соопштението.
