Европската комисија одобри итна финансиска помош од 114,7 милиони евра за Шпанија за справување со мигрантската криза во Сеута, која трае од крајот на јули. Од Брисел одлуката ја опишаа како израз на целосна солидарност со Шпанија.
Од вкупната сума, 82,7 милиони евра ќе бидат обезбедени преку Фондот за азил, миграција и интеграција, а 32 милиони евра преку Инструментот за управување со границите и визите.
Средствата ќе се користат за зајакнување на граничната контрола и безбедносната инфраструктура, вклучително и набавка на термовизиски камери, системи за следење, пловци и подводни дронови. Предвидени се и средства за дополнителен персонал и опрема, објекти за регистрација на мигранти, поддршка при враќање на лица без дозвола за престој и зголемување на прифатните капацитети.
Посебно внимание ќе биде посветено на грижата за малолетниците без придружба.
Во справувањето со кризата ќе бидат вклучени и европските агенции Фронтекс, Европол и Агенцијата на ЕУ за азил. Фронтекс ќе продолжи со операцијата „Минерва“, додека Европол ќе соработува со шпанските безбедносни служби во истрагите против мрежите за криумчарење мигранти.
Агенцијата на ЕУ за азил ќе обезбеди поддршка при разговорите со барателите на азил и преведувањето.
По потпишувањето на договорот, Европската комисија треба во рок од 30 дена да исплати до 80 отсто од одобрените средства. Финансиската помош може да се користи и ретроактивно за покривање на трошоците направени од почетокот на кризата.
