Претседателката на Народното собрание на Србија Ана Брнабиќ изјави дека очекува реакција од Европската Унија по насилните протести во Белград, при што побара осуда за нападите врз полицијата.
Таа посочи дека очекува Делегацијата на Европската Унија во Србија, како и нејзините претставници, да реагираат на случувањата пред Филозофскиот факултет и зградата на Ректоратот, каде, според неа, имало напади врз полициските службеници.
„Владеењето на правото треба да го почитуваат сите подеднакво. Ако вакви сцени се случуваа на улиците на Брисел, полицијата без двоумење ќе реагираше за да воспостави ред, а таков нерегистриран протест ќе беше растурен за неколку минути. Очекувам дека истите стандарди ќе се применат и во случајот со Србија“, изјави Брнабиќ.
Таа ја објави пораката на англиски јазик на социјалните мрежи, нагласувајќи дека очекува конзистентен пристап од европските институции кога станува збор за примената на правото и односот кон јавниот ред.
