ВМРО-ДПМНЕ преку соопштение соопшти дека Владата во изминатите две години спровела низа мерки и инвестиции со цел модернизација на земјоделскиот сектор, нагласувајќи дека резултатите се видливи преку реализацијата на капитални проекти и подобрувањето на институционалното функционирање.
Од партијата посочуваат дека биле деблокирани проекти кои со години не се реализирале, меѓу кои и кредитот од германската банка KfW во вредност од 80 милиони евра, како и проектот на Светската банка за модернизација на земјоделството.
Според ВМРО-ДПМНЕ, во тек е изградбата на логистичко-дистрибутивен центар во Скопје, кој треба да биде завршен до крајот на 2027 година, додека во Струмица се подготвува центар за сортирање и складирање на земјоделски производи. Дополнително, воведен е дигитален систем за управување со државното земјоделско земјиште, а склучени се повеќе од 2.100 договори за користење на околу 6.000 хектари земјиште.
Во областа на водостопанството, од партијата наведуваат дека минатата година биле обезбедени 132 милиони денари финансиска поддршка, зголемени се површините под наводнување, а повторно се активирани повеќе инфраструктурни проекти.
Во соопштението се истакнува и дека шумарството преминало од загуба во добивка од 10 милиони денари, воведен е дигитален систем за следење на шумските ресурси, склучени се 71 нов договор за концесија на ловишта, а Охридското Езеро повторно е порибено со околу еден милион единки охридска пастрмка.
Од ВМРО-ДПМНЕ додаваат дека се подготвени и нови законски решенија за земјоделството, земјоделското земјиште, руралниот развој, шумарството и уредувањето на пазарите, како и револвинг фонд за откуп на земјоделски производи.
Партијата оценува дека од проекти кои со години биле во застој, денес има активни инвестиции и конкретни придобивки за земјоделците, најавувајќи дека ќе продолжи со истото темпо на работа и во наредниот период.
