Европа се соочува со значајни демографски промени, а најновите податоци на Евростат за 2025 година покажуваат дека традиционалното семејство со повеќе деца станува сè поретка појава. Во исто време расте бројот на луѓе кои живеат сами или како парови без деца.
Според статистиката, од вкупно 203,1 милиони домаќинства во Европската Унија, само 47,4 милиони или 23,4 проценти имаат деца. Наспроти тоа, дури 76,6 проценти се домаќинства без деца, при што најголем дел се лица кои живеат сами.
Во последната деценија бројот на едночлени домаќинства пораснал за речиси 20 проценти, додека бројот на парови со деца се намалил за 6,3 проценти.
Најголем удел на домаќинства со деца има во Словачка, Ирска и Кипар, додека најмал процент бележат Финска, Литванија и Германија.
Податоците покажуваат и дека половина од семејствата со деца во ЕУ имаат само едно дете, 37,6 проценти имаат две деца, а само 12,2 проценти имаат три или повеќе деца.
За разлика од европскиот просек, Македонија сè уште има релативно поволен демографски профил. Од вкупно 595,6 илјади домаќинства во земјава, 33,9 проценти имаат деца, што е значително над просекот на ЕУ од 23,4 проценти.
Во македонските семејства најчесто има две деца. Според податоците, 43,4 проценти од домаќинствата со деца имаат две деца, 43,2 проценти едно дете, а 13,4 проценти три или повеќе деца.
Интересни се и податоците за еднородителските семејства. Во ЕУ околу 12,9 проценти од домаќинствата со деца се потпираат на само еден родител, а најголем дел од нив се самохрани мајки.
Во Македонија овој процент е значително понизок и изнесува само 2,6 проценти, што ја вбројува земјата меѓу државите со најмал удел на еднородителски семејства во Европа.
Податоците на Евростат, објавени по повод Светскиот ден на родителите, уште еднаш ги отвораат прашањата за демографските предизвици, стареењето на населението и намалениот наталитет со кои се соочува најголемиот дел од Европа.
