Бројот на загинати во силниот земјотрес што вчера ја погоди западна Колумбија се искачи на 224, според последните податоци на локалните власти што ги пренесува „Ројтерс“. Спасувачките екипи и натаму ги пребаруваат урнатините, а властите очекуваат бројот на жртвите да може дополнително да се зголеми.
Земјотресот со магнитуда од 7,4 степени ја погоди Колумбија вчера во 7:34 часот по локално време. Епицентарот бил во близина на Сан Хозе дел Палмар во департманот Чоко, на длабочина од 103 километри, според Колумбиската геолошка служба. Станува збор за најсилниот регистриран земјотрес во Колумбија во 21. век.
Меѓу најтешко погодените градови се Кали и Переира. Во Кали досега се потврдени најмалку 95 загинати и 949 повредени лица. Властите добиле пријави за 239 луѓе заробени по уривањето на објекти, а досега биле спасени 86 лица. Целосно или делумно се урнале 45 објекти, додека за уште 93 е утврдено дека се оштетени.
Во Переира, според последните податоци, загинале 72 лица. Цели станбени блокови се претвориле во купишта бетон и искривен метал, а спасувачите, полицајците, војниците и граѓаните во текот на ноќта ги пребарувале урнатините со багери, но и со голи раце.
Од Црвениот крст предупредија дека на некои локации се регистрирани звуци и други знаци што би можеле да укажуваат дека под урнатините сè уште има преживеани. Спасувачите оценуваат дека часовите што следуваат се клучни за нивно пронаоѓање.
Особено тешка е состојбата во една болница во Кали, каде што се урнале неколку горни катови, вклучително и делови наменети за педијатриски пациенти. Дел од пациентите останале заробени, а околу 600 луѓе биле згрижени на улицата пред оштетената зграда.
Голема штета е регистрирана и во Манизалес, каде што се урнала една од кулите на градската неоготска катедрала. Оштетена е и сообраќајната инфраструктура, а по земјотресот привремено бил прекинат сообраќајот на повеќе регионални аеродроми поради проверка на безбедноста на објектите.
Досегашните податоци покажуваат дека се оштетени околу 1.600 објекти, а најмалку 61 целосно се урнал. Колумбиската геолошка служба регистрирала најмалку 47 последователни потреси, од кои најсилниот бил со магнитуда од 4,8 степени.
Поради пријави за грабежи, во Кали и Переира во текот на ноќта бил воведен полициски час. Претседателот Абелардо де ла Есприела најавил испраќање дополнителни 1.000 припадници на безбедносните сили во Кали.
САД најавиле 15,5 милиони долари помош за привремено сместување, храна и други итни потреби. Помош понудиле и Мексико, Ел Салвадор и Чиле.
