Бројот на жртви во силниот земјотрес со магнитуда од 7,4 степени што ја погоди Колумбија се искачи на најмалку 53 лица, според последните податоци од локалните власти.
Најмногу жртви, 27, се потврдени во департманот Ваље дел Каука, каде што се наоѓа Кали. Во Переира, главниот град на департманот Рисаралда, загинале најмалку 18 лица.
Гувернерката на Чоко, Нубија Каролина Кордоба, потврдила уште четири смртни случаи во овој департман, каде што се наоѓал епицентарот на земјотресот. Во Манисалес, главниот град на департманот Калдас, потврдени се три жртви.
Уште едно лице загинало во департманот Антиокија. Станува збор за 73-годишен маж од Тамесис, врз кого паднала карпа одронета за време на земјотресот.
Спасувачките операции и проценката на материјалната штета сè уште траат, поради што властите предупредуваат дека бројот на жртвите би можел дополнително да се зголеми.
